Read zande Atambuahe 145 Bible Online

Atambuahe 145 - zande bible

Atambuahe 145

¹Gi Mbori, nga gi Bakindo, mi atáka pande rimoro, mi asámbua rimoro nye anye kindi.

²Mi asámbua ro na auru, ki tambua rimoro nye anye kindi.

³Yekova nga bahe, rengbe na tambua ko ni bakere he gbe, ka i rugu nga tise na pa gako du ni bahe te.

⁴Rika ngbatunga aboro atáasa pa gamo mangaapai fu kura rika ngbatunga aboro, ki taki pande pa gamo kangarã mangaapai.

⁵Gu baiiriwo du ni taasitaasi he nga ga ga irisa, mi abáka bangire tipa ha na tipa gamo iiriwo mangaapai.

⁶Aboro agúmba pa gu ngarã du ti gamo kigikigi mangaapai, mi atáka pande pa ga du ni bahe.

⁷I agúmba pa wo rimoro tipa ga wenesino du ni bakere he, ki ngbiko na wawa tipa ga rurupai.

⁸Yekova du na inapai, ki hi ahi na nunga aboro a, aipo nga na zinga ya, ki du na weneringise kpaima.

⁹Yekova du ni wene ko fu aboro dũ, gako wene nunga aboro du ku ri agu ahe dunduko ko amangi he.

¹⁰Ako Yekova, gamo mangaapai afú atambuahe foro dunduko, gamo ziazia aboro dunduko asámbua ro.

¹¹I agúmba pa gu taarimo nga ga ga ngbi, ki pe pa ga ngarã,

¹²ka yugo pa ga kangarã mangaapai fu awiri aboro, na gu taarimo nga ga ga baiiriwo ngbi.

¹³Ga ngbi nga nyenye ngbi, na ga zogarago nye fu arika ngbatunga aboro dunduko.

¹⁴Yekova nasongoda agu yo nati dunduko, ki nitumba agu yo nanugadi dunduko a.

¹⁵Bangiri aboro dunduko du koyo du mo ni, mo nafu gayo riahe fu yo ti regboho.

¹⁶Mo naza bero, ki nimbisi gu nyemuhe nga ga unga ahe dunduko.

¹⁷Yekova du ni ruru ko rogo gako apai dunduko, ni weneringi ko rogo gako mangaapai dũ.

¹⁸Yekova du mbembedi na agu yo dunduko nakpara fu ko, na agu yo dunduko ninakpara fu ko ni rengo.

¹⁹Ko nadigisa gu nyemuahe nga ga agu yo nagunde ti ko, ko nagia gayo kpe ku ari a, ki nibatasi yo.

²⁰Yekova nabanda agu yo dunduko nakpi nyemu ko; ono gbegberẽ aboro ko agbárasa yo dunduko.

²¹Ngbare agúmba pa tambua Yekova, aboro dunduko sámbua kparakpara ziazia rimoko asambua nye anye kindi.