Read zande Atambuahe 148 Bible Online

Atambuahe 148 - zande bible

Atambuahe 148

¹Oni támbua Yekova! Oni támbua Yekova angbangbaturũ yo, oni támbua ko rogo arago ari yo!

²Oni támbua ko, gako amaraika dunduko, oni támbua ko, gako rimbasa dunduko!

³Oni támbua ko, uru na diwi, oni támbua ko, oni nga akerekuru dunduko nakĩ!

⁴Oni támbua ko, oni nga angbangbaturũ nga ga angbangbaturũ, na oni nga aime du ku ri angbangbaturũ yo a!

⁵Si támbua rimo Yekova atambua! Bambiko ko arugu pai, si ki du ni mangimangi he!

⁶Ko anyakasi he nye anye kindi; ko afu gu rugapai ka adiga nga a ya.

⁷Oni támbua Yekova kpotosende no, oni nga anyaime du wa kpaka na dudungura arago dunduko,

⁸we na morogumba, na kputakputa mai na nduro, bazigizo yuge, nadigisa gako pai!

⁹Abaagangara na agangara dunduko, agu angua nazuka na angua kedara dunduko!

¹⁰Anya na zogozogo anya dunduko, agu agbiro nagbe tira na agu azire nagu ari yo!

¹¹Abakindo zegino na ngbatunga aboro du, abazogo na agu abasapungbanga dunduko du zegino!

¹²Paranga akumba na ade wa sa, gbinza akumba na agude!

¹³I nitámbua rimo Yekova atambua, bambiko kina ko sa du rimoko ni kiisikiisi pa ha; gako taarimo du ku ri kpotosende na ku ri ngbangbaturũ.

¹⁴Ko afu ome tipa gako aboro, gu tambuahe nga ga gako ziazia aboro, nga kina awiri aYisaraere, nga agu aboro mbedi na ko. Oni támbua Yekova!