Read zande Atambuahe 17 Bible Online

Atambuahe 17 - zande bible

Atambuahe 17

¹Ako Yekova, mo gí gu pai ru aru; mo dége turo sa gi yambahe! mo yé turo sa gi kpetambuahe, si akura nga ngba irazire yo te!

²Mo ídi ya pa gi sarangbanga kuru ku bara bangiro! bangiro bí gu pai ru aru!

³Ka mo asadi kpotore yo, ka mo ye ka bi re yuru, ka mo wisigi re, mo abí nga gbegberẽpai ti re te; ngbare ati nga ndika te.

⁴Tipa gu mangaapai nga ga aboro, mbiko gu pai nakuru ngbaro yo mi abanda tire be agu apai nga ga airazuu.

⁵Ndure aka kuti gamo agene nyanyaki, ndure azerenga nga te.

⁶Ako Mbori, mi akpára foro, bambiko mo akáraga pai fere; mo dége turo kono du mi ni, ki gi fugore.

⁷Ako, mo nga gu ko nabatasa agu yo nafu tiyo ku bero be agu yo naguari sa yo ku kumbabero, mo yúgu pa ga weneringise fu yo ni iiriwo pai.

⁸Mo bánda re wa rindi bangiro, mo nióko re ku tii nzereme puporo,

⁹be gu gbegberẽ aboro namanga re, nga kere avurare ke pati re kirikiri.

¹⁰I kisi kpotoyo yo tipa nunga; i nagumba pa ruka ni ngbayo.

¹¹I nagbata re; i ke pati re awere kirikiri; i namaa bangiriyo tipa ba re ku sande.

¹²I wa bahu ho zingo riahe namanga ru ni, wa kina paranga bahu naoka tiru rogo bagbuko.

¹³Ako Yekova, mo gúari! ki gbia yo, ki bafu yo ku sande! Mo bátasi ungare ni ga basape be gbegberẽ aboro,

¹⁴Ako Yekova, be aboro ni bero, be agu aboro du gayo pai kina rogo gi unga re. Vuyo yo hí be gu he igi mo ho tipa yo; awiriyo ki du na he susi gu rengbe a; i mbu yangara gayo ahe fu rukutu awiriyo.

¹⁵Ono tipa re, mi abí kpakpuro rogo rurupai; ho mi ka zinga ni, mi aréngba, bambiko mi abí ro wa du mo.