Read zande Atambuahe 18 Bible Online

Atambuahe 18 - zande bible

Atambuahe 18

²Yekova nga gi mbia, nga gi nyanyaki gbata nga gi batasi, gi Mbori nga gi mbia, mi akida kuti ko; gi vurakube, nga ome gi bata, nga gi sosono kirikiri gbata.

³Mi akpara fu Yekova, rengbe na tambua aboro ko; si du bati mi ti ni be avurare.

⁴Agiri kpio atapa re kirikiri, gu yasika ime nga basapambori nagundesi re;

⁵agiri Baatoro kpikpi aboro adu pati re kirikiri, agbina kpio aidi ka zia re.

⁶Mi akpari fu Yekova rogo gi fudifudipai, ki nipoi ku ari fu gi Mbori. Ko ki nigi fugore rogo gako yekaru yo, gi kpe ku ari ki ye ki ti ku tuko yo.

⁷Kpotosende ki wo ki nikio, amburu abaagangara ki nigbisi, ki du ni zigizozigizo ho bambiko ko azingi.

⁸Ngime ki nikuru õko yo, we ngbako ki niriti ahe; kingiriwe ki nirungudi be he.

⁹Ko anuga angbangbaturũ a, ki nizorõ, nduunduu bitimo ki du tii nduko yo.

¹⁰Ko ki oro ri keruba, ki gu; ii, ko agu ni ipo ri apupo yuge.

¹¹Ko asa bitimo ni gako basura pati ko kirikiri, bitimo nga ga aime, na nanaga mai angbangbaturũ yo ni gako bagbuko.

¹²Amorogumba na kingiriwe ki kuru rogo gako mai be gu imaima imarago naadu barangba ko.

¹³Yekova asu rogo angbangbaturũ yo, gu Ko nga Bahe ki susi, amorogumba na kingiriwe.

¹⁴Ko azumudi gako asiida, ki gbandaka yo; aikpira gumba akĩ, ki nimangi yo gbegberẽ.

¹⁵Ako Yekova, agene baime adu ni kusikusi he, mburu zegino ki du ni ku he, mbiko ga zahe, na gu utura onga nakuru orõ yo.

¹⁶Ko akedi sunge ngbangbaturũ yo, ki di re, ko agbe re rogo dungu aime yo.

¹⁷Ko abatasi re be nyanyaki vurare, na agu yo naasoga re, mbiko i adu na ome ki susi re.

¹⁸I aye fuo re rago gi gberãngbi; ono Yekova adu ni songodire.

¹⁹Ko akusi re ku rogo bakere rago a; ko abatasi re, bambiko mi angba ti ko.

²⁰Yekova amangi pai fere rengbe na gi rurupai; ko afu mosoro fere rengbe a wa bere adu ni gigiri he.

²¹Bambiko mi aka kuti agu apai nga ga Yekova, ka mi aguari nga pati gi Mbori nimangi gbegberẽpai ya.

²²Bambiko gako sarangbanga dunduko adu ku bangire, mi asa nga gako rugaapai ti re ku sa yo a te.

²³Mi azanga pai bara bangiriko, mi ki banda tire be irairapai.

²⁴Si du Yekova afu mosoro fere ti ni rengbe na gi rurupai, bambiko wa bere adu ni gigiri he bangiriko.

²⁵Mo nayugo tiro ni boro inapai fu boro inapai; mo nayugo tiro ni ruru ro fu ruru boro;

²⁶mo nayugo tiro ni gigiri ro fu gigiri boro; mo ki yugu tiro ni keretukeretu boro fu boro vura.

²⁷Bambiko mo abatasa rungorungo aboro; ono mo agbe bangiri airaenda ku sande.

²⁸Bambiko mo natiga gi baro; Yekova nga gi Mbori nahasa rago rogo gi bitimo.

²⁹Ni rengo mi nasusa dagba rikavura mbiko ro; mi nagu ri ngapa mbiko gi Mbori.

³⁰Ono tipa Mbori ― gako gene du ziazia; gu pai nga ga Yekova i wisigi he si da ti rengo; ko nga vurakube fu agu yo dunduko nafu tiyo ku be ko.

³¹Bambiko da du ni Mbori, fuo kina Yekova sa? Da du ni mbia, fuo kina gaani Mbori?―

³²nga gu Mbori naukadi re na ngarã, ki nimbakadi gi gene si du zezere.

³³Ko naipisa ndure si ipi wa ndu ngbiimo, ko namaa re ku ri tumbatumba arago.

³⁴Ko nayugo pa vura fu bere, bere ki gbe mboto sirigi.

³⁵Mo afu vurakube ga bata fere a, kumbabero asongodi re ku ari, ga undahe asa re ni bakere boro.

³⁶Mo akiisi ba ndure tii re yo, kpendure azerenga nga te.

³⁷Mi ado fuo avurare, ki gbia yo; mi akaraga nga tire te, daho mi anyasi yo ni.

³⁸Mi ahogi yo puu, ka i arengba nga na guari ya; i atiwi ku tii ndure yo.

³⁹Bambiko mo aukadi re na ngarã tipa so vura; mo amangi agu yo naaguari kuti re i nugadi bara bangire.

⁴⁰Mo amangi avurare a i sa giiyo fere, mi anyasi agu yo naasoga re.

⁴¹I akpari ku ari, ono boro adu nga ho sa ka batasi yo te, i akpari fu kina Yekova, ono ko akaraga nga pai fu yo te.

⁴²Mi asa yo tubutubu wa nvutu barangba yuge; mi abafu yo ku zegi yo wa gu birikobiriko he du bangiri agene.

⁴³Mo nabatasi re be gu zuba nga ga gimi aboro; mo asa re mi du ku ri arikaaboro; agu aboro mi aina nga yo ya, i ara fere.

⁴⁴Ho i agi pa re ni i agi sangbare ni ba sa; auro aye ka ra fere na goyo.

⁴⁵Auro apaya dũ, i akuru rogo gayo kisikisi rago nikio be gunde.

⁴⁶Yekova du ni ungako; sambuahe dú fu gi mbia, i kiisi pa Mbori nga ga gi bata,

⁴⁷nga Mbori naira gi bape, ki sa aboro ni zogozogo yo ku tii re;

⁴⁸nga gu ko nabatasi re be avurare; ii, mo atumba re ku ri agu yo naaguari kuti re; mo natuka re be airazuu.

⁴⁹Ako Yekova, si du mi afú atambuahe foro dagba arikaaboro yo, ki nibi bia tambuahe ti rimoro.

⁵⁰Ko nafu bakere bata fu gako bakindo; ki niyugu weneringise fu gako mbedimbedi boro, fu Dawidi na angbatungako nye anye kindi.