Read zande Atambuahe 22 Bible Online

Atambuahe 22 - zande bible

Atambuahe 22

¹Gi Mbori, gi Mbori, guari mo ti re sa gine? Turũ mo ti unda re tipagine, na tipa agu apai nga ga gi uko?

²Ako gi Mbori, mi nakpara na uru, ono mo akaraga nga pai te; na yuru a, ka mi aongoda nga ya.

³Ono mo du ni kparakpara ro ziazia, ni tumbatumba ro ku ri ga aYisaraere atambuahe.

⁴Abarani akida kuti ro; i akida kuti ro, mo ki batasi yo.

⁵I apai ku ari foro, ki bati; i akida kuti ro, ka zee amanga nga yo ya.

⁶Ono sooro nga mi, nga boro te; nga ga aboro ũgbarasahe, aboro apayasi re.

⁷Agu yo nabi re dunduko i namoma re ni wia, i nayugo pai kuti re ni ngbayo, ki nipikipo riyo, niya,

⁸“Ko afu tiko ku be Yekova; kina ko bátasi ko; ko bátasi ko ke, si ngia ngba ko angba ti ko!”

⁹Ono mo nga gu ko nakusi re rukumbu yo; mo abanda re ti ngba mamu nina.

¹⁰I aba re rukumbu yo ku be ro, mo adu ni gi Mbori tona ti vunga nina re.

¹¹Ka mo nitúrũ nga pati re ya; bambiko fudifudipai mbedi bambiko a nga boro ho ka unda re te.

¹²Dungu abaabagara nake pati re kirikiri, nyanyaki abaabagara Basana nadusia re kirikiri;

¹³ami nangana re niza ngbara, wa kina gbiriwogbiriwo gbungugbungu bahu.

¹⁴I uka re wa ime, memere dunduko wo awo; kpotore yo wa dada, si zaraga rogo ngbadure yo;

¹⁵omere ugu wa ngbadi akoro, mirãre nadika tihe kuti biringa ngbare; mo napiga re ku rogo nvutu kpio.

¹⁶Ii, aango ake pati re kirikiri a; gu dungurati nga ga gbigbita aboro aru gangi pati re; i rũ bere na ndure―

¹⁷mi rengbe na geda memere dunduko― i nangana re ki niumo re;

¹⁸i nakparaka gi remu dagba yo, ki ba ake tipa gi baukadi.

¹⁹Ako Yekova, ka mo túrũ nga ya! Ako mo nga gi mounda, mo ípisi tiro ka unda re!

²⁰Mo bátasi mbisimore be basape, nga gi bangisa wene he be tandu ango!

²¹Mo bátasi re be ngba bahu, ii, mo káraga pai fere dagba gbanga abaagbeẽ yo!

²²Mi atáka pande rimoro fu awirinami; mi atámbua ro dagba rimbasa agu aboro;

²³Agu roni nagunde ti Yekova, oni támbua ko! angbatunga Yakoba, oni dunduko táasi rimoko, gunde ko dú ti roni, angbatunga aYisaraere dunduko!

²⁴Bambiko ko apayasi nga pa gu gberãngbi nga ga rungorungo boro ki sogo ho a te; ko aoka nga kpakpuko ti ni te, ono ho ni akpari ni fu ko ku ari, ko agi he.

²⁵Gi tambuahe naye yo du mo ni ku dagba bakere rimbasa agu aboro; mi adígisa pa gi kidohe ku bara bangiri agu yo nagunde ti ko.

²⁶Bayee aboro arí ahe ki mbiki ambika; agu yo nagbata Yekova i atámbua ko! Kpotoroni yo nyé anye ni ungaha kindi!

²⁷Digida kpotosende atíngida ha dunduko ki sa tihe koyo du Yekova ni; ngbatunga arikaaboro afú irisa bara bangiriko.

²⁸Bambiko pa zoga ngbi du ni ga Yekova, ko nazoga arikaaboro.

²⁹Agu aboro nga bakindigi airakumuko auru kpotosende, i arí riahe ki niirisi ko; agu yo nazorã ku nvutu sende yo i anúgadi ku bara bangiriko, na gu ni arengba nga na banda ungani ni tini ya.

³⁰Ngbatunga aboro amanga pa ko; i agúmba pa Gbia fu gu rika ngbatunga aboro nikaye,

³¹ki taki pande pa gako ruru sarangbanga fu agu aboro i ata vunga nga yo ya, ya ko du namangi he.