Read zande Atambuahe 24 Bible Online

Atambuahe 24 - zande bible

Atambuahe 24

¹Kpotosende du ni ga Yekova na agu ahe du rogo ho dunduko, zegino na agu yo naraka rogo ho;

²bambiko ko amoi mburuhe auru abaime, ki mbakadi he auru adi.

³Da ka dakpa ku ri ga Yekova gangara yo? Da ka ru rogo gako kparakpara ziazia ba yo?

⁴Gu ni du na gigiri beni, na ziazia kpotoni yo, akiisa nga mbisimoni sa sawia ya, azunga nga he ni biriki a ya.

⁵Ni adía maku be Yekova, na diapairi be Mbori gani bata.

⁶Gere nga gu rika ngbatunga agu yo nagbata ko, nagbata kpakpuro, Ako ga Yakoba Mbori.

⁷Ako akpuguru, oni tútumba rironi! I tútumba roni, Ako oni nga nyenye angbadimo! Bakindo taarimo ki rimi.

⁸Da nga Bakindo taarimo? Yekova du na ngarã na nyaka a, Yekova du na nyaka pati vura!

⁹Ako akpuguru, oni tútumba rironi! i tútumba roni, Ako, oni nga nyenye angbadimo! Bakindo taarimo ki rimi.

¹⁰Da nga gi Bakindo taarimo re? Yekova nga ga arimbasa ko, Ko nga Bakindo taarimo!