Read zande Atambuahe 27 Bible Online

Atambuahe 27 - zande bible

Atambuahe 27

¹Yekova nga gi imarago nga gi bata; da ka mi gunde be ni? Yekova nga gu gbata nga ga ungare; da ka mi gunde be ni?

²Ho amangi gbigbitapai ka ye ni sa re, ka rita borore, nga agu yo nafuda re na avurare, i akótoka ki tiwi.

³Ka rimbasa sovura vura ye kuti re vurũ, kpotore yo agúnde nga te; ka vura vura guari kuti re vurũ, mi adú zukazuka.

⁴Pai sa sana mi Yekova tipa ha, si mi agbáta ha; nga mi nye tii ga Yekova bambu yo wa du mi ni ungare kindi, ka bi gu wene ngbanya nga ga Yekova, ki nimakia pai rogo gako yekaru yo.

⁵Bambiko rago gbigbitapai ko abánda re rogo gako basura rogo gbuko; ko aóka re ku tii gako bamburoko yo, ko atúmba re ku ri mbia yo.

⁶Awere rire nikadu ni tumbatumba ha kuti avurare pati re kirikiri; mi afú amotumo ni ngbarago na wawa rogo gako bamburoko yo; mi abí bia ki bi abia tambuahe fu Yekova.

⁷Ako Yekova, ho mi ka akpara ni ni fugore, mo nigí he, mo íni pai fere, ki karaga pai fere!

⁸Mo aya, “Oni gbáta kpakpure.” Kpotore yo naya foro, “Yekova, mi agbáta kpakpuro.”

⁹Ka mo nióko nga kpakpuro ti re ya. Ka mo nibá nga vururo ku sa yo ni zinga ya, mo naadu ni gi mounda, ka mo nibá nga re ku sa yo, ki mbu re ya, Ako Mbori gi bata!

¹⁰Bambiko buba mbu re na nina, ono Yekova adía re.

¹¹Ako Yekova, mo yúgu pa ga gene fere, ki ngbe fere ku mbata yo ngba ruru gene bambiko avurare.

¹²Ka mo nifú nga re ku be gu nyemu pai nga ga agu yo nafuda re ya; bambiko airazire adezire mo kuti re, nga agu yo nakusa pa zuu.

¹³Ono mi idi mi abí gu wenesino nga ga Yekova rogo ringara unga aboro ni rengo!

¹⁴Mo súngudi Yekova; mo dú nyanyaki, kpotoro yo ki ngarã; ii, mo súngudi Yekova!