Read zande Atambuahe 31 Bible Online

Atambuahe 31 - zande bible

Atambuahe 31

¹Ako Yekova, mi fu tire ku be ro; ka zee mángi nga re wa sa ya; mo bátasi re ni ga rurupai!

²Mo yé turo kono du mi ni, mo bátasi re ni ipo! Mo dũ wa mbia bagbuko fere, ni nyanyaki gbata ka batasa re!

³Bambiko mo nga gi mbia nga gi gbata; si du mo ka ngbe fere ti ni ku mbata yo mbiko rimoro, ki nigasi re,

⁴ki tuka re rogo gu pio i are he ni gbuko tipa re, bambiko mo nga gi nyanyaki gbata.

⁵Mi fu torore ku be ro; Ako Yekova mo atumo re, nga Mbori nga irarengo.

⁶Mi nasoga agu yo naberã pa kungba ahe gbua; ono mi nakida kuti Yekova.

⁷Mi adú pusiapusia ki ningi tipa ga weneringise, bambiko mo abi gi gberãngbi, mo aini pa ga mbisimore fudifudiapai,

⁸mo akusa nga re ku be iravura te; mo amoi ndure ku rogo bakere rago.

⁹Ako Yekova, mo íni pai fere, bambiko mi rogo fudifudipai; bangire nagaka be rungo, ii, mbisimore na kpotore yo a.

¹⁰Bambiko wa du mi ni ungare na kina rungo, gimi agãra nasaka re na kina uko; omere bati mbiko gi irairapai, amemere ki kuruka.

¹¹Mi du wa ũgbarasarimo bangiri agu yo nafuda re dunduko, ki du ni ũgunde fu akuare; ni ũgbudagbuda fu agu yo ini mi yo a; agu yo nabi re ngba gene bakporo i naora aora be re.

¹²Pare go ti yo a wa pa kpikpi boro nigo rogo berã; mi du awere wa kurugbo akoro.

¹³Bambiko mi nagia ga dungu aboro gberãngbayo― bakere gunde du ku bani na ku bani!― wa i amongo gumba rondo kuti re, ki berẽ pa dia ungare ti re.

¹⁴Ako Yekova, ono mi nakida kuti ro, mi ya, “Mo nga gi Mbori.”

¹⁵Ragore du be ro; mo bátasi re be avurare na be agu yo narungosi re!

¹⁶Mo ídi he kpakpuro hasi rago ku auru vururo; mo bátasi re ni ga weneringise!

¹⁷Ako Yekova, ka zee mángi nga re ya, bambiko mi nakpara foro; zee mángi gbegberẽ aboro amanga, i óngo aonga kii ku Baatoro kpikpi aboro yo.

¹⁸Ngba agumbazire óngo aonga kii, nga agu yo nagumba ruguzuruguzu pai kuti ruru aboro, ni enda na wasiro.

¹⁹Ako, na kii ga wenesino, nga gu mo aidi pa ha tipa agu yo nagunde ti ro, nga gu mo ambakadi tipa agu yo nafu tiyo ku be ro, ku bangiri awiri aboro!

²⁰Mo naoka yo be ga aboro tabura rogo gu gbugbu rago du bara bangiro; mo nabanda yo rogo ga basura be gu vura nga ga amirãse.

²¹Yekova dú ni sambuasambua ko, bambiko ko ayugu gako iiriwo weneringise fere ho mi adu ni wa mi ni zizi re ku rogo nyanyaki gbata.

²²Ono mi tigimi, mi aya ni gi tukapai, “I dewe re gii bangiro.” Ono mo agi pa gimi akpesarawati, ho mi akpari ni foro ku ari.

²³Ako, oni kpí nyemu Yekova, oni dunduko nga gako ziazia aboro! Yekova nabanda yososo aidipase, ono ko nafu mosoro gani pai fu iraenda kpaima.

²⁴Oni nyáki, kpotoroni yo ki ngarã, agu roni dunduko namaa bangironi kuti Yekova!