Read zande Atambuahe 33 Bible Online

Atambuahe 33 - zande bible

Atambuahe 33

¹Ako, oni nga ruru aboro, oni ngbíko rogo Yekova yo! Ngba tambuahe angba ku ngba agu yo du ni ruru yo.

²Oni fú atambuahe fu Yekova na nzenze, oni bí abia tambuahe fu ko na gu kindondo du giriru bawe!

³Oni bí vovo bia fu ko, oni táki kundi ni rubangirise na bakere wawa.

⁴Bambiko ga Yekova pai ru he aru; gako mangapai dunduko du ni mangimangi he rogo yososopai.

⁵Ko nakpi nyemu rurupai na ruru sarangbanga; kpotosende hi be gu weneringise nga ga Yekova.

⁶Angbangbaturũ adu ni mangimangi he mbiko gu pai naakuru ngba Yekova yo, na rimbasa gaha ahe dunduko be gu ome onga naakuru ngbako yo.

⁷Ko adungura aime baime ku rogo badonaha sa; ko amoi dudungura arago ku rogo baigaahe.

⁸Kpotosende dunduko gúnde be Yekova, agu aboro naraka zegino dunduko iriwoko dú ti yo!

⁹Bambiko ko agumba pai, si ki du ni mangimangi he; ko arugu pai, si ki du.

¹⁰Yekova nasa sangba arikaaboro ni kungba he; ko namanga ga aboro mbakada berã si du gbua.

¹¹Sangba Yekova naru ku baha waragoagira, agu aberã du kpotoko yo si fu rika ngbatunga aboro dunduko.

¹²Aboro maku nga gu rikaaboro du gayo Mbori nga Yekova, nga agu aboro ko asia yo i du ni gako ũkumuko!

¹³Yekova ngbangbaturũ yo nangera, ki nibi awiri aboro dunduko;

¹⁴rogo gako banye yo ko nangera ni ku ri araki auru kpotosende no dunduko,

¹⁵kina ko nambakada kpotoyo yo dunduko, ki nikparia pa gayo mangaapai dunduko.

¹⁶A nga bakindo sa ka bati mbiko bakere rimbasa aborosovura te; iranyaka abata nga mbiko bakere ome a te.

¹⁷Maabangirise kuti farasi afu nga diabese te, u arengba nga na batasa boro be gau bakere ngarã a te.

¹⁸Oni ngére, bangiri Yekova du ti agu yo nagunde ti ko, nga agu yo namaa bangiriyo tipa gako weneringise,

¹⁹ko batasi mbisimoyo be kpio, ki banda yo ni ungayo rago gberãngbi.

²⁰Mbisimorani nasunguda Yekova; ko nga gaani mounda nga gaani vurakube.

²¹Ii, kpotorani yo nangi rogo ko yo, bambiko wa kida ani kuti kparakpara ziazia rimoko.

²²Ako Yekova, ga weneringise dú ku ri rani, a wa moi ani bangirani ti ro.