Read zande Atambuahe 35 Bible Online

Atambuahe 35 - zande bible

Atambuahe 35

¹Ako Yekova, mo pái pa re fu agu yo nazuba re; mo só vura kuti agu yo naso vura kuti re!

²Mo zádi vurakube na bakikii vurakube, ki guari ku ari tipa unda re!

³Mo táĩ baso na andigba kuti agu yo nadusia re! Mo yá fu mbisimore, “Mi nga ga bata!”

⁴Agu yo nagbata ungare zee mángi yo na wasiro a! I káraga agu yo ku sa yo naberã pa imisa re ki nimungosi yo a!

⁵I dú wa kina umuhe barangba yuge, ga Yekova maraika ki nido yo ku mbata yo!

⁶Gayo gene dú na bitimo zezerenge, ga Yekova maraika ki nidusia yo!

⁷I aoko gayo pio due yo tipa re zanga nduhe; i age due tipa ungare zanga nduhe a.

⁸Gberãngbi ye ku ri yo ki tunguo yo! Gu gayo pio i aoko ho si zí kina yo; i tĩwi ku rogo ho tipa gbarasa yo!

⁹Mbisimore adú pusiapusia rogo Yekova yo, si angí angi rogo gako bata.

¹⁰Amemere dunduko ayá, “Ako Yekova, da du wa mo, nabatasa irarungo be gu ni nyaki susi ni, irarungo nga irazingohe be gu ni nagbarasa ni a?”

¹¹Irazire adezire naru ku ari; i nasana re tipa agu apai mi aina nga ha ya.

¹²I nakaraga gbigbitapai fere ku ba wenepai; mbisimore ki gberẽ mbiko ho.

¹³Ono mi tigimi, ho i adu ni na kaza― mi aukadi mbuzaroko, mi arungosi mbisimore na gina riahe. Gi kpetambuahe ki nikaraga tihe kina ku ngbadure yo,

¹⁴wa ka mi arungo tipa wene badiare watadu wirinina; mi andu kirikiri wa gu boro nakpara tipa nani, nidua rire na kpenunga.

¹⁵Ono ho mi akoto ni i angi angi ki dungura tiyo wa sa, ki dungura tiyo wa boro sa kuti re; gu gbarĩgbarĩ yo mi aina nga yo ya ki nigbarasi rimore zanga mbu he;

¹⁶wa gbegberẽ airasawia pati pumbo, wo i ari ngba rindiyo sa re.

¹⁷Ako Yekova, rago adú waĩ mo nibi agi apai re? Mo bátasi re be gayo gberãangbi, nga gi bangisa wene he be abahu!

¹⁸Mi afú atambuahe foro dagba bakere rimbasa agu aboro; mi atámbua ro dagba dungu aboro a.

¹⁹Ka avurare ningí nga ku ri re ni wia ya, ka agu yo pírĩ nga bangiriyo kuti re nasoga re zanga nduhe ya.

²⁰Bambiko i agumba nga pa zereda te, i naberã pa nangahe kuti agu yo sungu zezeredi rogo gi ringara re.

²¹I nazara ngbayo kuti re gbagaza; ya yo, “Eke, Eke! bangirani bi he!”

²²Ako Yekova, mo abi he; ka mo nióngo nga ya! Ako Gbia, ka mo nitúrũ nga na mi ya!

²³Mo zíngisi tiro, ki zingi tipa gi pai, tipa gi pai, gi Mbori nga gi Gbia!

²⁴Ako Yekova gi Mbori, mo dí pai ri re, a wa du pa ga rurupai; ka i ningí nga ku ri re ya!

²⁵Ka i niyá nga kpotoyo yo, “Eke, wo ngba ha ti rani!” ya. Ka i niyá nga, “Ani mbiri ko dũ”, ya.

²⁶Zee mongo mángi agu yo na mungo nangi tipa imisa re! i úkadi agu yo na wasiro na zee nakiisa pa tiyo kuti re!

²⁷I ngbíko angbiko ni ngbarago, ningi angi, nga agu yo ngba gi diapairi angba ti yo, i niyá dedede, “I kíisi pa rimo Yekova, nga gu ko rago nangba ti ko tipa ga vuruko wenepia!”

²⁸Mirãre agúmba pa ga rurupai, na pa ga tambuahe na uru pitipiti.