Read zande Atambuahe 36 Bible Online

Atambuahe 36 - zande bible

Atambuahe 36

¹Samungu nafura na gbegberẽ boro ku kpotoni yo; gunde ti Mbori si bangirini te.

²Ni nazomia kina pa tini bangirini tigani, ya i agbata nga gani irairapai ki bi he ki sogo ho te.

³Agu apai du ngbani yo nga kina irairaapai na nangahe; ni ambu pa manga pai na tatamana na wenepai.

⁴Ni naberã pa manga irairaapai auru gani barame; ni namaa nduni ngba gu gene adu nga ni wene he ya; ni agindiga nga gbigbitapai te.

⁵Ako Yekova, ga weneringise nada ku angbangbaturũ yo, ga yososopai da ku rogo mai yo.

⁶Ga rurupai wa kina ga Mbori abaagangara, gamo asarangbanga du wa dudungura he; Ako Yekova, mo ninabanda aboro na anya a.

⁷Ako Mbori, na kii pa ga weneringise! Si du awiri aboro nagbu ti ni ku tii kirima puporo.

⁸I ambíka be gu riahe du rogo ga bambu kpaima, mo afu mbirimbiri ime ti gamo di angbarago.

⁹Bambiko gugaabi unga du be ro; rogo ga imarago ani nabi imarago.

¹⁰Ako, mo dógodi na ga weneringise gbe fu agu yo ini ro, na ga rurupai a fu agu yo du kpotoyo yo ni ruru he!

¹¹Ka ndu enda yé nga sa re ya, ka be gbegberẽ boro gbísi nga re a ya.

¹²Yo amangi irairapai atiwi ni, i bafu yo ku sande, ka i arengba nga na guari ku ari berewe ya.