Read zande Atambuahe 37 Bible Online

Atambuahe 37 - zande bible

Atambuahe 37

¹Ka mo nizíngisi nga tiro tipa amangi gbigbitapai ya, ka mo nikpí nga pai kuti agu yo namanga irairapai a ya!

²Bambiko i adéwa yo mbembedi wa nvuo, i ki paya wa iwo kpepasio.

³Mo kída kuti Yekova, ki mangi wenepai; si mo ka nye rogo ringara ti ni, ki du ni bandabanda ro.

⁴Ga ngbarago dú rogo Yekova yo a, ko afú agu ahe foro du nyemu he kpotoro yo.

⁵Mo fú ga pai ku be Yekova; ki kida kuti ko a, ko amánga pai tipa ha.

⁶Ko ayé na ga diapairi wa imarago, na gu pai ru foro wa bebere uru.

⁷Mo óngo kii bara bangiri Yekova, ki sungudi ko zezeredi; ka mo nizíngisi nga tiro tipa gu ni u au rogo gani apai ya, tipa gu boro namanga sangba gbegberẽ aberã a ya!

⁸Mo mbú pa zinga, ki he era! Ka mo nizíngisi nga tiro ya, mbiko si nakusa kina manga gbigbitapai.

⁹Bambiko i agbándaka amangi gbigbitapai agbandaka; ono agu yo nasunguda Yekova i adía kumbo ringara.

¹⁰Bambiko fuo rago ngbutuko, gbegberẽ boro adú nga ho berewe te; ka mo vura wisiga ba ni sirisiri vurũ, ni adú nga ho te.

¹¹Ono bayee aboro adía kumbo ringara, ki du na ngbarago tipa gu wenepia du kpaima.

¹²Gbegberẽ aboro nata bura ruru boro, ki niri ngba rindiyo sa ni;

¹³ono Yekova namoma gbegberẽ boro, bambiko wa ko nabi he ya gani rago nadiga.

¹⁴Gbegberẽ aboro namofa basape, ki darĩ gayo amboto, ka bafa airarungo ku sande na airazingo ahe, ka imo agu yo nata ni ruru yo;

¹⁵gayo basape aríma kina ku kpotoyo yo, gayo amboto akúadi.

¹⁶Gu bete umba ahe du be ruru boro si ngba susi gu ũkumuko du kpaima be dungu gbegberẽ aboro.

¹⁷Bambiko i akúadi be gbegberẽ aboro; ono Yekova nasongoda ruru aboro.

¹⁸Yekova naina pa ga ziazia aboro rago, gayo ũkumbo anyé anye kindi;

¹⁹zee amanga nga yo rago gbigbitapai te, i ambika rago gberãngbi.

²⁰Ono gbegberẽ aboro akpika; avura Yekova adu wa wene abanambu, i nanyasa ― wa ngime nagbandaka.

²¹Gbegberẽ boro nao ahe, ka ni arengba nga na gasa ha berewe ya, ono ruru boro namanga apai ni inapai, ki nifu ahe;

²²agu yo Yekova afu maku fu yo i adía kumbo ringara, agu yo ko atiwa yo i adía yo ku sa yo.

²³Yekova nambakada pa ga boro nduge, rago ki ningba ti ko be gani apai;

²⁴ka ni vura ti, ni atí nga kindi te; bambiko Yekova nasongoda ni ni beko.

²⁵Mi adu mbata ni parangare, mi gbinza awere; ono mi ata bi nga ruru boro i nambu ni te, na ngbatungani i nio riahe a te.

²⁶Ni namanga apai ni inapai na uru pitipiti, ki niunda aboro, ngbatungani ki du ni aboro maku.

²⁷Mo gúari pati gbigbitapai, ki nimangi wenepai; si du mo ka nye ti ni kindi!

²⁸Bambiko Yekova nakpi nyemu ruru sarangbanga; ko ambú nga pa gako ziazia aboro te. I abánda ruru aboro nye anye kindi, ono i aróga ngbatunga gbegberẽ aboro ku sa yo.

²⁹Ruru aboro adía kumbo ringara, ki nye anye kindi.

³⁰Ngba ruru boro nagumba pa tatamana, mirãni nasapa ngbanga ni ruru he.

³¹Gu rugute nga ga gani Mbori du kpotoni yo; ka nduni azerenga nga wa sa ya.

³²Gbegberẽ boro napida ruru boro, niasadi ka imo ni.

³³Yekova ambú nga ni ku beni te, ko agbarasa nga ngbanga fu ni ho i ka sapa ngbanga ni ni a te.

³⁴Mo s úungudi Yekova, ki ka kuti gako pai, ko akíisa pa ro mo di kumbo ringara; ho i ka gbarasa gbegberẽ aboro ni, mo abí he.

³⁵Mi abi gbegberẽ boro ni nikiisi pa tini, ni agbaragi tini wa iwo ngua rogo gaha rago.

³⁶Ono mi ki susi, oni ngére, ka ni adu nga ho ya; ii, mi agbata ni, ka mi abi nga ni a ya.

³⁷Mo kpária pa ziazia boro, ki bi ruru boro, bambiko wenepai adu fu boro zereda ku mbata yo.

³⁸Ono atiandika, i amongo gbárasi yo; digida ga gbegberẽ aboro apai i adía ha ku sa yo.

³⁹Ono ga ruru aboro bata si aye be Yekova; ko nga gayo nyanyaki gbata ti rago fudifudipai.

⁴⁰Yekova naunda yo, ki nibatasi yo; ko natuka yo be gbegberẽ aboro, ki nibatasi yo, bambiko wa fu yo tiyo ku be ko.