Read zande Atambuahe 38 Bible Online

Atambuahe 38 - zande bible

Atambuahe 38

¹Ako Yekova, ka mo zá nga re ni ga zinga ya, ki rugu re ni ga fafoi erã a ya!

²Bambiko gamo asiida rũpu re nganganga, bero duria re ni pai.

³Kpotore ngapungapu be ga imisiri ngbaduse wa sa te; zereda adu nga rogo amemere tipa pa gi ingapai te.

⁴Bambiko gimi irairapai fu ri re; wa rõrõi tindiro si rõi susi omere.

⁵Gimi aoro nafũ ki nizirĩ, bambiko gi mungo.

⁶Mi naima ki ninuga gbe; mi nakpara kpenunga na uru pitipiti.

⁷Bambiko dimore rungudi wa we, kpotore ngapungapu wa sa te.

⁸Mi rungbura ki mburu gbe; mi napaa apaa ku ari be gu fudifudipai du kpotore yo.

⁹Gbia, gi nyemuhe si ku bangiro dunduko, gi uko ni okooko ho ti ro te.

¹⁰Kpotore yo naonga zorokozoroko, omere nabata; tipa gu imarago nga ga bangire ― si guari ti re a.

¹¹Akpinyemure na akuare i naru ku sa yo ti gi oro, agumere ki ru tuturũ a.

¹²Agu yo nagbata ungare i nareka agbina tipa re, agu yo nagbata pa imisare i nagumba imiimi apai, ki niberẽ pa nangahe na uru pitipiti.

¹³Ono mi tigimi, mi du wa kina irangbiango, mi agia nga pai te, mi ki du wa boro bubo afura nga ya.

¹⁴Ii, mi du wa gu boro ninagia nga pai ya, wa gu ni adu nga sakapai ngbani a ya.

¹⁵Ako Yekova, mi nasunguda kina ro; Ako Yekova gi Mbori, kina ro nikakaraga pai fere.

¹⁶Bambiko mi ya, “Ka i ngí nga ku ri re ya, nga agu yo kiisi pa tiyo kuti re ho ndure naazerenga ni!”

¹⁷Mi mbedi ka ti, gi imisiripai ki nye na kina re.

¹⁸Bambiko mi kusi gi irairapai, mi narungo tipa gi ingapai.

¹⁹Ono avurare nanyaka, ki du na ome, agu yo nasoga re ni wia i ni badungu yo.

²⁰Agu yo nakaraga gbigbitapai fere ku ba wenepai i nga abakitingbangare, bambiko mi napeka gu pai dũ ni wene he.

²¹Ako Yekova, ka mo mbú nga re ya! Ako gi Mbori, ka mo túrũ nga pati re ya!

²²Mo ípisi tiro ka unda re, Ako Gbia nga gi bata!