Read zande Atambuahe 40 Bible Online

Atambuahe 40 - zande bible

Atambuahe 40

¹Mi asungudi Yekova zezeredi; ko ki dege tuko kono du mi ni, ki gi gi kpe ku ari.

²Ko akusi re rogo gbigbita due yo, rogo gbedegbede pere, ko ki ta maa ndure auru mbia, ki nyakasi gimi agene.

³Ko amoi vovo bia ku ngbare, nga bia tambuahe fu gaani Mbori. Dungu yo abí he, ki gunde, ki nikida kuti Yekova.

⁴Boro maku nga gu boro namaa Yekova ka kida kuti ko, ara nga fu airaenda ya, na fu agu yo nasa tiyo fuo kungba ambori a ya!

⁵Ako Yekova gi Mbori, mo angeesi gamo iiriwo mangaapai na gamo aberã du kono du ani ni; i arengba nga na ringbisa ha na mo te! Bambiko ka mi vura nitaki pande he ki nigumba pa ha, si asúsa gu ka i gedi he.

⁶Rago angba nga ti ro tipa motumo na rũhe te; ono mo aza ture. Zozo motumo na motumo ingapai mo asana nga he tipa ha a te.

⁷Mi ki ya, “Mo ngére, mi ye; i ake pa re rogo kitabu;

⁸Ako gi Mbori, rago ngba ti re ka amanga gu pai ngba angba ti ro; ii, ga rugute du kpotore yo.”

⁹Mi ataki pande pa ga rurupai, dagba bakere rimbasa agu aboro; mo ngére, mi akisa nga ngbare te, Ako Yekova mo ini he.

¹⁰Mi aoka nga pa ga rurupai ku kpotore yo te, mi ataki pande pa ga yososopai na ga bata; mi aiga nga ga weneringise na ga rengo be bakere rimbasa agu aboro a te.

¹¹Ako Yekova, ka mo béngete nga re na ga wene nunga aboro ya, na ga weneringise na ga rengo si nibánda re abanda kindi!

¹²Bambiko badungu gbigbitapai navo gbu pati re kirikiri; gimi irairaapai nadusia re, si du mi arengba nga ka ngera ku ari te; si nge susi mangerire; si du rungbura kpotore yo ti ni.

¹³Ako Yekova, si ngbá ti ro ka batasa re! Ako Yekova, mo ípisi tiro ka unda re!

¹⁴Zee nimongo mángi agu yo na mungo nagbata ungare ka imo ho; i káraga yo berewe sa wasiro nga agu yo rago nangba ti yo tipa gimi imisiriapai!

¹⁵I nibáki bangiriyo abaka tipa gayo pa zee, nga agu yo naya fere, “Eke, Eke!”

¹⁶Agu yo dunduko nagbata ro i ningí angi ki du na ngbarago rogo ro yo; agu yo nakpi nyemu ga bata i niyá dedede, “I kíisi pa rimo Yekova!”

¹⁷Ono tipa re, wa du mi ni rungorungo re na zingoahe a; Yekova naberã pa re, Mo nga gi mounda nga batasire; Ako gi Mbori, ka mo íma nga koyo gbe ya!