Read zande Atambuahe 42 Bible Online

Atambuahe 42 - zande bible

Atambuahe 42

¹Ako Mbori, wa gbodi naonga zorokozoroko tipa ime amunga, kina wo mbisimore naonga tipa ro.

²Gomoro tipa Mbori namanga mbisimore, nga unga Mbori. Mi ayé ku bara bangiri Mbori ni gini rago?

³Aumere adu ni gi riahe na uru na yuru, wa i nagumba ha fere dedede, niya, “Ga Mbori wari?”

⁴Mi nitingidi pa agi apai re, ki uka mbisimore ku kpotore yo, wa mi anandu na rimbasa aboro, ki ningbe fu yo ku mbata yo ku rogo ga Mbori bambu yo, ni fugo ngbarago na abia tambuahe, rimbasa aboro nimangi kparakpara pumbo.

⁵Ako mbisimore, tipagine mo nidu ti ni zezere, tipagine du mo ti ni ni fudifudi ro rogo re yo? Mo mói bangiro ti Mbori; bambiko mi nikatambua ko berewe, nga gi mounda, nga gi Mbori.

⁶Ako gi Mbori, mbisimore du zezere rogo re yo, si du mi natingida pa ro ti ni ringara Yaradene yo na Erumona yo, na Bagangara Misara yo a.

⁷Dudungura ime nayamba dudungura ime be paa ga buyebuye aime; ga ngambiringambiri abaime dunduko nafu ri re na ga sungburasungbura ime a.

⁸Ono Yekova ayugo gako weneringise uru, gako bia ki du na mi yuru, nga kpetambuahe fu ga ungare Mbori.

⁹Mi naya fu Mbori nga gi mbia: “Tipagine go bangiro ti ni ti re! Tipagine mi nindu ti ni na rungo be gu rungosi nga ga iravura?”

¹⁰Wa basape du rogo memere yo, kina wo agu yo nafuda re nagbarasa rimore; wa i nagumba ha fere dedede, niya, “Ga Mbori wari?”

¹¹Ako mbisimore, tipagine mo nidu ti ni zezere, tipagine du mo ti ni ni fudifudi ro rogo re yo? Mo mói bangiro ti Mbori, bambiko mi nikatambua ko berewe, nga gi mounda, nga gi Mbori.