Read zande Atambuahe 44 Bible Online

Atambuahe 44 - zande bible

Atambuahe 44

¹Ako Mbori, ani agi he ni turani, abarani agumba pa gu sunge fu rani mo amangi he ti gayo arago, ti agu arago naadu bakuru yo:

²mo ado arikaaboro ni bero, ki moi kina yo ku ba yo; mo anamanga aboro gbigbita, ki nigbandaka yo rogo zegino dũ;

³bambiko i adia nga ringara ni gayo kumbo mbiko gayo basape te, beyo abatasa nga yo ni tihe a te; ono kina kumbabero, na mbiribero, na gu imarago nga ga kpakpuro; bambiko mo nangba na yo.

⁴Mo nga gi Bakindo nga gi Mbori, naruga pa bata fu Yakoba.

⁵Mbiko ro ani améfa agu yo nafuda rani ku sande; mbiko rimoro ani asímba agu yo ku sande namo kuti rani.

⁶Bambiko mi akida nga kuti gi mboto te, gi basape abatasa nga re a te.

⁷Ono mo abatasi rani be agu yo nafuda rani, ki ba zee ku ri agu yo nasoga rani.

⁸Ani asámbua tirani na uru pitipiti mbiko Mbori, ani afú atambuahe fu rimoro kindi.

⁹Ono mo ba rani ku sa yo awere, ki wasi rani, mo akura nga na gaani arimbasa aborovura a te.

¹⁰Mo naamangi rani ani sa giirani fu irafudifudipai; agu yo nasoga rani i nagbu ahe ni gayo.

¹¹Mo anifu rani wa agu akandoro i nasia ra tipa imo ra, ki gbandaka rani ku dagba arikaaboro.

¹²Mo bagi gamo aboro gbua tipa mosoro te, mo akiisa nga ga ũkumuko be gu marã mo abi tipa baga yo te.

¹³Mo naasa rani ni ũgbarasarimo fu akuarani, ni ũumohe na ũmongo fu agu yo du pati rani kirikiri.

¹⁴Mo naasa rani wa agu yo aboro nagumba sanza yo dagba arikaaboro, wa agu yo i nawo ti ri kuti yo dagba aboro.

¹⁵Gi wasiro nidu barangba re na uru pitipiti, zee zi re ti kpakpure gbe,

¹⁶bambiko fugo soapai na airagberãngba yo, ku bangiri iravura na bairibape.

¹⁷Gere dunduko naye ku ri rani, ono pa ro ata go nga ti rani te, ani abirika nga na pa ga zungahe a te.

¹⁸Kpotorani yo asa nga tihe ku sa yo te, ndurani ata guari nga ngba ga gene a te,

¹⁹wa mo akuadi rani rogo gu rago nga ga ahuá, ki dadi rani ni nduunduu bitimo.

²⁰Ka rimo gaani Mbori go ti rani, watadu ka ani ataĩ berani fu kungba mbori;

²¹a nga si gu Mbori awisiga ha te? Bambiko ko ini pa gu gbugbu apai du kpoto yo.

²²Ai, i naimo rani aimo na uru pitipiti tipa ro, i nageda rani wa akandoro tipa imo ra.

²³Ako Gbia, mo zíngi! Tipagine mo nara ti ni? Mo gúari ka mo bá nga rani ku sa yo kindi ya!

²⁴Tipagine mo naoka kpakpuro ti ni? Tipagine pa gaani gberãngbi nago ti ni ti ro na gaani imisiriapai?

²⁵Bambiko mbisimorani nanuga kina ku nvutu sende yo; vurani nadika tihe kuti sende.

²⁶Mo gúari ku ari ka unda rani! Mo túmo rani mbiko ga weneringise!