Read zande Atambuahe 45 Bible Online

Atambuahe 45 - zande bible

Atambuahe 45

¹Wenepai hihisi kpotore yo niuka auka; mi nagumba pa agu apai mi ambakadi tipa bakindo; mirãre nga gu wiri ngua waraga nga ga ipiipi bakeapai.

²Mo ngba susi awiri aboro; i auka undahe ku ti kpotongbaro; si du Mbori afu maku ti ni foro nye anye kindi.

³Ako iranyaka, mo tápa ga basape ku padimoro, na ga taarimo na ga bairiwo!

⁴Mo ndú rogo ga kiki ki u au, tipa pa rengo na umbasiti na rurupai; kumbabero yúgu kigikigi apai foro!

⁵Gamo asiida du ni tĩtĩ he ku kpoto avura bakindo yo; aboro natiwa ku tii ro.

⁶Ako Mbori, ga mbatabakindo, si nye anye kindi. Ngbondo rurupai, nga gu ngbondo nga ga ngbi;

⁷mo nakpi nyemu rurupai, ki nisogo gbegberẽpai. Si du Mbori nga ga Mbori ambedi ro ti ni ni gu nzeme nga ga wasa susi akuaro;

⁸gamo aroko dunduko nafũ na fuõ agu angua nga mure na aaroi na kinanona. Agu anzenze naye rogo agu abambu bakindo dua yo ho ni rindiambarã si angiisi ro;

⁹awiri abakindo nga ade du dagba gamo ade irisa; nakindo naru ku kumbabero ni ukadiukadi ri ni gu dahabu naye Ofiri yo.

¹⁰Ako wiri boro nga de, mo gí he, ki berẽ pa ha, ki dege turo; pa gamo aboro gó ti ro, na ga bamo kporo a;

¹¹si du bakindo akpi nyemu wene ngbanyaro ti ni. Wa du ko nga ga gbia, mo írisi ko;

¹²aboro Tura adu yo na gamunihe be yo, kumukokumuko aboro dagba aboro azungadi ro tipa wene ngbanyaro a.

¹³Wiri bakindo nga de du ni taasitaasi ri vuru ga bakindo bambu yo; gari roko du ni tutu he na giri dahabu.

¹⁴I nagasa ri ku bara bangiri bakindo na gu roko i arungu he ni dondidondi he, gu ngasu ade napeka ri nga akuari.

¹⁵I nagasa yo na ngbarago pusiapusia, wa i arima ku rogo ga bakindo bambu yo.

¹⁶Awiro nga akumba adú ku ba abamo; nga agu yo mo ka sa yo ni abazogo auru kpotosende dunduko.

¹⁷Mi ambákada rimoro i ki tingi pa ha dagba rika angbatunga aboro dunduko; si du aboro ka fu atambuahe ti ni foro nye anye kindi.