Read zande Atambuahe 49 Bible Online

Atambuahe 49 - zande bible

Atambuahe 49

¹Oni nga aboro dunduko, oni gí gere! Oni nga araki rogo arago dunduko, oni yé turoni,

²payapaya pa yo na kikiipa yo a, irakumuko wa sa na irazingo ahe!

³Ngbare agúmba pa tatamana apai; gu makia pa apai du kpotore yo si adú na rugatinapai.

⁴Mi adéga ture tipa fugo sanza; mi akúsa gi masaku rogo bia nzenze.

⁵Tipagine ka mi agúnde ti ni rago gbigbitapai, ho gu irairapai nidu ni pati re kirikiri nga ga amangire,

⁶nga agu yo nakida kuti gayo kumuko niabia tiyo tipa gayo dungu ũkumuko?

⁷A nga boro ho sa rengbe na tumo wirinani te, watadu ka fu motumo fu Mbori tipa ni a te,

⁸bambiko tumo mbisimoni du ni kikiipa he, gasi pa ha agasa kindi,

⁹ya ni nye ni ungani kindi, ka ni abi nga zirã ya.

¹⁰Ii, ko abí he ya tatamana aboro akpíka akpika, iramungo akpí wa sa na irazuu a, ki mbu gayo kumuko fu kura aboro.

¹¹Gayo berã kpotoyo yo naya, ngbatungayo anyé anye kindi, gayo kporo ki nye fu rika ngbatunga aboro dunduko, ka i vura yamba rimo gayo ringara ti kina rimoyo vurũ.

¹²Ono boro arengba nga ka nye na gani irisa kindi te, ni wa agu anya nakpí akpi.

¹³Gere nga ga agu yo gene naberã pa mungo, ono fuo yo aboro nangba na kina gayo apai.

¹⁴I aasia pa yo wa akandoro tipa Baatoro kpikpi aboro; Kpio adú ni babandayo; ruru aboro azóga yo ho rago nikagira ni, ngbanyayo apaya kina ku Baatoro kpikpi aboro yo, ka ba adú nga tipa nye he yo ya.

¹⁵Ono Mbori atúmo mbisimore be tandu Baatoro kpikpi aboro, bambiko ko adía re.

¹⁶Ka mo nigúnde nga ho boro nidu ni ni kumukokumuko ni, ho gu taarimo nga ga gani kporo naakpatari ni ya.

¹⁷Bambiko ho ni ka kpi ni, ni andú nga na he koyo te; gani taarimo azórã nga fuo ni a te.

¹⁸Ka ni vura fu maku fu mbisimoni ho ni nidu ni ni ungani, aboro ki nitambua ni ho ni naamanga pa tini ni wenengaĩ,

¹⁹ni andú koyo du rika ngbatunga atitani ni, i abí nga imarago berewe te.

²⁰Boro arengba nga ka nye na gani irisa kindi te, ni wa agu anya nakpí akpi.