Read zande Atambuahe 5 Bible Online

Atambuahe 5 - zande bible

Atambuahe 5

¹Ako Yekova, mo yé turo sa gimi apai; mo kpária nga pa gi makia pai.

²Gi Bakindo, nga gi Mbori, mo dége turo tipa gi kpe ku ari; bambiko mi nakpara foro.

³Ako Yekova, wiso mo nagia fugore; wiso mi ka aruga pa gi kpe foro, ki ningere.

⁴Bambiko mo adu nga ni gu Mbori du na ngbarago ti ro tipa gbegberẽpai te; gbigbita boro anye nga na mo te.

⁵Airarekangose aru nga ku bara bangiro te; mo nasoga amangi irairapai dunduko.

⁶Mo nagbarasa agu yo nagumba zire; Yekova nasoga abaimiaboro na airanangahe a.

⁷Ono mi tigimi, mi ayé ku rogo ga bambu yo mbiko ga weneringise du kpaima, mi aírisa ro ni ngera koyo du ga kparakpara ziazia yekaru ni, nigunde ti ro.

⁸Ako Yekova, mo ngbé fere ku mbata yo rogo ga rurupai bambiko avurare; mo mbákadi ga gene ti bara kpakpure ni ruru he.

⁹Bambiko rurupai ngbayo yo te; kinaku gbegberẽpai du kpotoyo yo, gorõyo yo du wa gbagaza murã, i naazomia he kina auru ngbayo.

¹⁰Ako Mbori, mo díka gayo pai kina ku ri yo; i tíwi kina be gayo rondo; mo dó yo tipa gayo dungu tiandika, bambiko i sa mungu kuti ro.

¹¹Ono agu yo nafu tiyo ku be ro i ngí angi, i ningbíko na ngbarago; mo bánda yo, ya agu yo nakpi nyemu rimoro i dú pusiapusia rogo ro yo.

¹²Ako Yekova, bambiko mo nafu maku fu ruru boro; mo nadada ni na ga ngbanya wa vurakube.