Read zande Atambuahe 50 Bible Online

Atambuahe 50 - zande bible

Atambuahe 50

¹Mbori ri ambori, nga Yekova, nagumba pai ki yambu kpotosende tona ho uru na kura ni ki da ti ti he.

²Siona du ni ziazia bakporo, yo ga Mbori imarago naakura ni.

³Gaani Mbori naye, ko aonga nga kii te, we nazokada rago fu ko ku mbata yo, rago ki niwo gugugu pati ko kirikiri.

⁴Ko nayamba angbangbaturũ ari yo na kpotosende, ya ko sapu ngbanga gako aboro;

⁵“Oni dúngura gimi ziazia aboro kono du mi ni, nga agu yo ani aringbisi pa zungahe dagba rani na yo ni motumo!”

⁶Angbangbaturũ nataka pande gako rurupai, bambiko Mbori nga basapungbanga ni tiko!

⁷“Ako gimi aboro, oni gí he, mi agúmba pai, Ako Yisaraere, mi agúmba dezirepai kuti ro, mi nga Mbori nga kina ga Mbori.

⁸Mi aza nga ro tipa gamo amotumo te; gamo zozo amotumo du bara bangire kindi.

⁹Mi adía nga babagara rogo ga kporo te, na bameme rogo gamo andugu a te.

¹⁰Bambiko anya birengua yo dunduko nga kina gimi ra, na rimbasa zogozogo anya ri abaagangara du wa kutu sa a.

¹¹Mi ini azire ari dunduko, anya nvuo nga kina gimi ra.

¹²“Ka gomoro amanga re, mi agumba nga pa ha foro te; bambiko zegino nga gimi, na agu ahe du rogo ho dunduko.

¹³Mi nari pasio abaabagara, ki nimbiri kure ameme?

¹⁴Mo túmo fu Mbori ni motumo tambuahe, ki digisi pa gamo akidohe fu gu Ko nga Bahe ki susi;

¹⁵mo kpári fere ti rago fudifudipai; mi abátasa ro, mo ki taasi rimore.”

¹⁶Ono Mbori aya fu gbegberẽ boro wẽ: “Gini he ka mo taki pande gimi rugaapai ti ni, watadu dia pa gi zungahe ku ngbaro?

¹⁷Wa du he tie nga mo nasoga rugapai, ki nibafu gimi apai ku giiro yo.

¹⁸Ka mo bi iradĩ, mo angba na ni; ga pai adu wa sa na airabari.

¹⁹“Mo nafu ngbaro sa gbigbitapai, mirãro ki niberẽ pa biriki.

²⁰Mo nasunga ki nide ringo ti wiribamo; mo nasoa pai kina kuti boro wirinamo.

²¹Agi apai re mo amangi, mi ki ongo kii; mo abẽre he tigamo ya mi adu wa kina ro. Ono mi naza ro awere, ki rugu pa ha nzunzu ku bangiro.

²²“Oni kpária pa gere, agu roni pa Mbori nago bangironi, mi ka sipa roni rukutu, ka boro adu nga ho ka batasa roni ya!

²³Gu ni natumo ni motumo tambuahe ni nataasa rimore; tipa gu ni naruga gani apai ni ruru he mi ayúgo pa ga Mbori bata fu ni!”