Read zande Atambuahe 51 Bible Online

Atambuahe 51 - zande bible

Atambuahe 51

¹Ako Mbori, mo íni pai fere, ku sangba ga weneringise yo; mo gbándaka pa gi samungu a wa du gamo wene nunga aboro ni ngenge he.

²Mo zúndu re kpou be gi irairapai, ki girisi re be gi ingapai!

³Bambiko mi idi pa gi samungu, gi ingapai bangire kindi.

⁴Kina ro sa, mi aingi pai kuti ro, ki mangi gi gbigbitapai re ku bangiro, ya ga pai dũ ni ruru he ho mo nagumba apai ni, ki du ni ruru ro ho mo nasapa ngbanga ni.

⁵Mo ngére, i ame re na irairapai, nina ki du na mobarare na kina ingapai.

⁶Mo ngére, du rengo kpotoboro yo ngba ha angba ti ro; mo yúgu pa ina tatamana fere rogo gu pare gbu agbu.

⁷Mo gírisi re na kpengua nga usopo, mi ki giri; mo zúndu re, mi ki vuru ki susi morogumba.

⁸Mo yá fere mi gi pa wasa na ngbarago; ya agu ameme mo akuadi he si du pusiapusia.

⁹Mo óko kpakpuro ti gimi ingaapai, ki gbandaka gimi irairaapai dunduko.

¹⁰Ako Mbori, mo fú gigiri kpoto yo ku rogo re yo, ki mbakadi torore berewe ku rogo re yo ni ruru he nyanyaki.

¹¹Ka mo bá nga re bara bangiro ku sa yo, ki di ga Ziazia Toro ti re ya.

¹²Mo káraga gu wasa nga ga ga bata fere, ki nisongodi re ni wene esuesu toro.

¹³Si du mi ka yugo gamo agene ti ni fu atiandika, aboro ingapai ki karaga tiyo koyo du mo ni.

¹⁴Ako Mbori, mo bátasi re be pa kure imoboro, mo nga Mbori nga gi bata, ngbare ki bi bia ni wa wa tipa pa ga ruru mangapai.

¹⁵Ako Gbia, mo nizá ngbare, ngbare atáka pande pa tambuaro.

¹⁶Bambiko rago naangba nga ti ro tipa motumo te; ka mi afu zozo motumo rago angba nga ti ro tipa ha te.

¹⁷Gu motumo ngba ti Mbori nga toro rungo; gu kpoto yo naima be rungo ingapai, Ako Mbori, mo apáyasi nga ha te.

¹⁸Mo mángi wenepai fu Siona a wa du pa ga wene ngbanya; mo dúa angapa Yerusarema berewe,

¹⁹si du rago angbá ti ro ti ni tipa ruru amotumo, tipa zozo amotumo na gu zozo amotumo du na baha; i atúmo na abaabagara ku ri ga bamotumo.