Read zande Atambuahe 55 Bible Online

Atambuahe 55 - zande bible

Atambuahe 55

¹Ako Mbori, mo yé turo sa gi kpetambuahe; ko mo óko nga tiro tipa gi kpesarawati ya!

²Mo dége turo, ki karaga pai fere; mi nawo be gi baka bangirise, ni zuruma;

³be gu fugo nga ga iravura, na be gu rungosi nga ga gbegberẽ aboro. Mbiko i ba irairapai ku ri re, ki nirungosi re ni gayo zinga.

⁴Kpotore yo naima aima rogo re yo gbe, airiwo kpio ki ti ku auru re.

⁵Bakere gunde naye sa re na kio, gbudagbuda ki zi re.

⁶Mi ki ya, “Ako ka mi nidu na pupo ti re wa ga mbipo! Ka mi gu agu ku sa yo, ki sungu zezeredi;

⁷ii, ka mi merẽ tuturũ, ki nye ku ngbakunga yo.

⁸Ka mi ipisi tire ku bagbuko yo be gugugu yuge na bazigizo a.”

⁹Ako Gbia, mo gbárasi gayo pai, ki kparaka fugoyo; bambiko mi bi pa zuu rogo bakporo na kpata a.

¹⁰Uru na yuru i nata ata kirikiri ri ngapaha; irairaapai du rogo ho na sawia a,

¹¹gbegberẽapai du rogo ho; bau na biriki aguari nga ngba gene gaha kporo te.

¹²Bambiko si adu nga wa vurare asoi pai kuti re te― ka si adu wo ka mi ahi he; si adu nga wa sogore akiisi pa tini kuti re a te― ka si adu wo ka mi aoko tire be ni.

¹³Ono mo du, nga gu boro rengbe na kina re, nga kuare, ni wene badiangbare a.

¹⁴Ani anidu na wene ngbanya dagba rani na mo nifura zezeredi; ani anita ata na mo rogo ga Mbori bambu na rimbasa aboro.

¹⁵Kpio zí yo azia ni ba sa; i zórõ ku Baatoro kpikpi aboro yo ni kina ungayo; bambiko gbigbitapai du fu yo rogo gayo banye.

¹⁶Mi tigimi, mi nakpara fu Mbori; ono Yekova abátasa re.

¹⁷Nyemu, wiso na bebere uru a, mi nakpara gi kperungo ki nikpari ku ari, ko agía fugore agia.

¹⁸Ko abátasa mbisimore zezeredi be gu vura nadu kuti re, bambiko i ni dungu yo naso vura kuti re.

¹⁹Mbori agía fugore, ki payasi yo, nga gu ko nadu ho mbata a kindi; i nga agu yo adu nga na satise ti yo ya, agunde nga ti Mbori a ya.

²⁰Gu kuare ataĩ beko kuti abadiangbako, ko abiriki rogo pa gako zungahe.

²¹Fugo ngbako azerenge wa nzeme bagara, ono vura adu ku kpotoko yo; gako gumbapai arungbura susi nzeme, ono si adu wa agu abaasape i aima mofa.

²²Mo bá ga tindiro ku auru Yekova, ko asóngoda ro; ko aída nga i gbisi ruru boro wa sa te.

²³Ako Mbori, kina ro nikaye na yo ku rogo due gbarasahe; abaimiaboro na airabiriki adú nga ni ungayo tipa kina bebere gayo rame te. Ono mi akída kuti ro.