Read zande Atambuahe 57 Bible Online

Atambuahe 57 - zande bible

Atambuahe 57

¹Ako Mbori, mo íni pai fere, mo íni pai fere, bambiko mbisimore fu tihe ku be ro; mi agbú tii kirima puporo, daho gi gbegberẽpai re ka susa ni.

²Mi nakpara fu Mbori nga Bahe ki susi, fu Mbori nadigisa gako pai fere dunduko.

³Ko akéda pai ngbangbaturũ yo, ki batasi re, ko ába zee ku ri agu yo nakpi nyemu ka rita re. Mbori akéda gako weneringise na gako rengo!

⁴Mi pi aagba abahu; dagba agu yo nagbi wa we; nga awiri aboro, du rindiyo wa abaso na asiida, mirãyo wa tĩtĩ basape a.

⁵Ako Mbori, i kíisi pa ro ri angbangbaturũ! Ga taarimo dú adu ku ri kpotosende dunduko!

⁶I mbakadi pio tipa ba ndure; mbisimore anuga ku sande. I age due ngba gi gene, ono kina yo ni tiyo natiwa ku rogo ho.

⁷Ako Mbori, kpotore yo ru nyanyaki, kpotore yo ru nyanyaki! Mi abí bia, ii, mi abí bia atambuahe!

⁸Ako mbisimore, mo zíngi! Ako kindondo, oni zíngi na nzenze! Mi azínga ngbatutu a tigimi!

⁹Ako Gbia, mi afu atambuahe foro dagba aboro; mi abí bia atambuahe foro dagba arikaaboro.

¹⁰Bambiko ga weneringise kii ki da ku angbangbaturũ yo, ga rengo ki da ku rogo mai angbangbaturũ yo a.

¹¹Ako Mbori, i kíisi pa ro ku ri angbangbaturũ! Ga taarimo dú adu ku ri kpotosende dunduko!