Read zande Atambuahe 59 Bible Online

Atambuahe 59 - zande bible

Atambuahe 59

¹Ako gi Mbori, mo bátasi re be avurare, mo túmba re ku ari be agu yo namo kuti re.

²Mo bátasi re be amangi irairapai, ki nibatasi re be abaimiaboro.

³Mo ngére, bambiko i namaa rago tipa mbisimore; airaome nadungura tiyo kuti re. Ako Yekova, bambiko gi samungu te, na gi ingapai a te,

⁴i naora ki nitangara tiyo wa adu nga irairapai ku ri re ya. Mo gúari tie, ka unda re, mo bí he!

⁵Ako kina ro, Yekova Mbori nga ga arimbasa ko, nga ga aYisaraere Mbori. Mo zíngi ka mbusa arikaaboro dunduko; ka mo niíni nga pai fu agu airabiriki nasanga berã pa gbegberẽpai ya.

⁶I naakaraga tiyo na nyemu i napaa apaa wa aango napaa, ki ke pati bakporo kirikiri.

⁷Kina yo du yo ni i afu ni ni ngbayo buza, abaasape du ngbayo yo― bambiko ya yo wẽ, “Da nikagia pa rani?”

⁸Ako Yekova, ono mo namoma yo; mo namaa arikaaboro dunduko i du adu bamongo.

⁹Ako gi Ome, mi asúnguda ro; Ako Mbori, bambiko mo nga gi sosono kirikiri gbata.

¹⁰Gi Mbori agbía re na gako weneringise; Gi Mbori aída ha fere mi bi diasima ku ri avurare.

¹¹Ka mo ími nga yo ya, payo ka go ti gimi aboro; mo gbándaka yo ni ga ngarã, ki payasi yo, Ako Gbia nga gaani vurakube!

¹²Bambiko gu ingapai du ngbayo, na agu apai du ngbayo yo, i zí yo azia rogo gayo enda. Bambiko gu motiwa na gu zire i naagumba,

¹³mo nyási yo ni ga erẽ, mo nyási yo, daho i ka anye nga ni berewe ya, aboro ini he ya Mbori nazoga Yakoba dati digida kpotosende.

¹⁴I naakaraga tiyo na nyemu, i napaa apaa wa aango napaa, ki nike pati bakporo kirikiri.

¹⁵I nagbandaka ku bani na ku bani tipa riahe, ka i ambi nga ya, i ki nye yo yuru sasasa.

¹⁶Ono mi abí bia pa ga ome, mi abí bia ni wawa tipa ga weneringise na awiso. Bambiko mo adu ni gi sosono kirikiri gbata, ni bagbuko rago gi fudifudipai.

¹⁷Ako gi Ome, mi abí bia atambuahe foro, Ako Mbori, bambiko mo nga gi sosono kirikiri gbata, nga Mbori nayugo weneringise fere.