Read zande Atambuahe 60 Bible Online

Atambuahe 60 - zande bible

Atambuahe 60

¹Ako Mbori, mo aba rani ku sa yo, mo akpara dagba rani; mo azingi; Ako, mo káraga rani berewe.

²Mo azigizo ringara; ki sari he; mo mbákadi sapusapu he berewe, bambiko si nawo.

³Mo amangi gamo aboro i bi kpakarakpakara apai; mo afu nzaunzau imekakue fu rani ani mbiri he.

⁴Mo afu bendere fu agu yo nagunde ti ro, si ki du ni yuguyugu he be rengo.

⁵Agu yo ki bati du nyemu yo ti ro, mo fú diabese fu rani ni kumbabero ki karaga pai fu rani!

⁶Mbori agumba pai rogo gako kparakpara ziazia pai; niya, “Mi akpára Sekeme, mi angí angi gbe ki niringbisi pa Ngboongboorago Sukota.

⁷Girada nga gimi; Manase nga gimi a; Efuraima nga gi kpakpari vura; Yuda nga gi barugupai.

⁸Moaba nga gi pere zundati; mi aba gi rakata fu Edome; mi ata ngbare na diasima ku ri Feresete.”

⁹Da nikagasa re ku rogo nyanyaki gbata? Da nikangbe ku mbata yo fere ku Edome yo?

¹⁰Ako Mbori, atika mo aima ba rani ku sa yo? Ako Mbori, mo nakura nga na gaani arimbasa aborosovura a te.

¹¹Ako, mo fú undahe fu rani kuti irafudifudipai, bambiko ga boro undahe si gbua!

¹²Ani amánga pai ni ngarã wa du Mbori na ani; bambiko ko nga gu ko nikasimba agu yo nafuda rani ku sande.