Read zande Atambuahe 62 Bible Online

Atambuahe 62 - zande bible

Atambuahe 62

¹Mbisimore nasunguda kina Mbori kii; gi bata naye be kina ko.

²Kina ko nga gi mbia nga gi bata, nga gi sosono kirikiri gbata; i agbísa nga re gbe te.

³Rame waĩ oni niguku kuti boro, oni dunduko imi ni, wa nuganuga pere bambu, na regeteregete ngapa?

⁴I nasaka pai tipa ba ni pati gani dukuripai. Rago naangba ti yo mbiko azire. I naasambua he ni ngbayo, ono i naatiwa he ku kpotoyo yo.

⁵Mbisimore nasunguda kina Mbori kii, bambiko gi maabangirise naye be kina ko.

⁶Kina ko nga gi mbia nga gi bata, nga gi sosono kirikiri gbata; i agbísa nga re te.

⁷Gi bata du mbiko Mbori na gi taarimo a; gu mbia nga ga gi ome, na gi bagbuko, si nga Mbori.

⁸Ako oni nga aboro, oni nikída kuti ko na arago dunduko; oni úka kpotoroni yo ku bara bangiriko; Mbori nga bagbuko fu rani.

⁹Payapaya aboro du wa kina ndurõ ni rengo, kikiipa aboro du wa ũzire; i nandu kina ku ari auru marã ringbisaahe; i ue akpura susi uturangba.

¹⁰Ka oni nikída nga kuti pa tuka ahe ki ra fu he a ya; ka ũkumuko amaa pai, ka oni mói nga kpotoroni yo tipa ha ya.

¹¹Mbori agumba pai bara sa, mi ki gi gi pai re bara ue: ya ome nga ga Mbori he;

¹²Ako Gbia weneringise nga gamo a. Bambiko mo naringbisa ahe fu aboro dunduko ni ba sa sa kuti gayo mangaapai.