Read zande Atambuahe 66 Bible Online

Atambuahe 66 - zande bible

Atambuahe 66

¹Oni tá ngbaroni ni ngbarago fu Mbori, zegino dunduko;

²oni bí bia taarimoko ku ari; oni mbákadi tambuako ni taasitaasi he!

³Oni yá fu Mbori, “Gamo mangaapai nakigisa aboro! Avuraro agía sangbaro na gunde bambiko ga ome du ni bakere he.

⁴Zegino dunduko nairisa ro; i nabi bia tambuahe foro, ki nibi abia ti rimoro.”

⁵Oni yé ka bi agu apai Mbori amangi: ko du na kiki rogo gako mangaapai dagba aboro.

⁶Ko asa baime ni ugu rago; aboro asi di ni nduyo. Yo ani angi ni rogo ko yo,

⁷nga gu ko nazoga rago be gako ngarã nye anye kindi, bangiriko ninakparia pa arikaaboro― ka airasamungu akíisa nga pa tiyo ya.

⁸Ako aboro, oni sámbua gaani Mbori, i gí woro tambuako agia mbiko ho,

⁹nga gu ko nabanda rani dagba unga aboro, ko aida nga ndurani zerenge te.

¹⁰Ako Mbori, bambiko mo aini pa rani be wisiga ha; mo aasadi rani, a wa i naasada feda.

¹¹Mo aye na ani ku rogo pio; mo atabuga imisiri tindiro ku dimorani;

¹²mo aidi he aboro si ri rani; ani andu rogo we na ime a; ono mo akusi rani ku rogo kumukokumuko rago.

¹³Mi aríma ku rogo ga bambu yo na zozo amotumo; mi adígisa pa gimi akidohe foro,

¹⁴nga gu ngbare agumba pa ha, ngbare ki kido pa ha ho mi adu ni rogo fudifudipai.

¹⁵Mi atúmo na anya nzeme ni zozo amotumo foro, na ga abaameme wene fuõngua motumo; mi atúmo na abaabagara na ameme a.

¹⁶Oni yé, ki gi he, oni dunduko nagunde ti Mbori, mi atáka pande pa gu pai ko amangi tipa re.

¹⁷Mi akpari fu ko ni ngbare, rimoko adu ni taasitaasi he ri mirãre.

¹⁸Ka mi aidi na irairapai ku kpotore yo, Gbia agia nga pa re te.

¹⁹Ono ni rengo Mbori agi pa re; ko adege tuko sa gi kpetambuahe.

²⁰Mbori dú ni sambuasambua ko, bambiko ko ambu nga gi kpetambuahe te, ko adia nga gako weneringise ti re a te!