Read zande Atambuahe 68 Bible Online

Atambuahe 68 - zande bible

Atambuahe 68

¹Mbori gúari, avurako gbándaka agbandaka; agu yo nasoga ko i óro be ko!

²Wa yuge nado ngime, kina wo i ka do yo; wa dada nazaraga be we, kina wo gbegberẽ aboro ka kpi be ru yo bara bangiri Mbori!

³Ono ruru aboro ngí angi; i dú pusiapusia bara bangiri Mbori; i ningí angi ni ngbarago!

⁴Oni bí abia fu Mbori, oni bi bia atambuahe ti rimoko; oni dé basisi gene fu gu ko nandu kuru ngbakungba yo; rimoko nga Yekova; oni ngí angi bara bangiriko.

⁵Mbori nga ba fu awirianyaure, ni basapungbanga fu adekurugbo, rogo gako kparakpara ziazia banye.

⁶Mbori namaa gu ni zanga gume ku dagba aborokporo; ko nakusa kisikisi aboro ku rogo wenepia; ono airasamungu nasunga rogo gu ringara du na ugure.

⁷Ako Mbori, ho mo angbe ni ku mbata yo fu gamo aboro, ho mo andu ni rogo ngbakungba,

⁸kpotosende azigizo tihe, angbangbaturũ ki nifu mai, ku bara bangiri Mbori; Sinai azigizo tihe ku bara bangiri Mbori a, nga ga aYisaraere Mbori.

⁹Ako Mbori, mo akedi mai kpaima; mo anyakasi pa ga ringara, ho si ambu ni;

¹⁰gamo aboro abi baraka yo; Ako Mbori, mo anambakada he ni ga weneringise fu irazingoahe.

¹¹Gbia arugu pai; agu ade nataka pande pa ha i ni bakere rimbasa aboro:

¹²“Abakindo ku ri rimbasavura naora, i naora!” Agu ade naanye kporo yo i akparaka gbugbu ahe,

¹³ka i vura pika rogo ga akandoro andugu― wa apupo mbipo ni dadidadi he na feda, na mangeru ni nzerenzere dahabu.

¹⁴Ni gu rago gu Ko du na tandu apai dũ agbandaka abakindo yo, si adu wa ka morogumba ana Saremona yo.

¹⁵Ako nyanyaki bagangara, nga bagangara Basana; ako bagangara Basana du tukputukpu!

¹⁶Mo nga tukputukpu bagangara, tipagine mo angera ngera ringo ti ni, koyo du gu bagangara ni Mbori akpi nyemu he tipa gako banye? ii, yo Yekova ka nye ni, nye anye kindi.

¹⁷Ga Mbori angbagidavura du wa 20,000, wa kina kutu akutu, Gbia du dagba yo Sinai yo, rogo gako kparakpara ziazia ba.

¹⁸Mo aga ku ari yo, mo angbe ku mbata yo fu gamo rimbasa zizi aboro, mo arogo agamunihe be aboro, ii, dagba airasamungu a, ya Yekova Mbori niraki yo.

¹⁹Gbia dú ni sambuasambua ko, nga gu ko natinda gaani tindiro na auru; Mbori nga gaani bata.

²⁰Gaani Mbori du fu rani ni Mbori batasi rani; pa bata be kpio du ni ga MBORI he nga Gbia.

²¹Ono Mbori adéwa ri avurako, na gu bakere mangeri nga ga gu ni nadogoda rogo gani ingapai.

²²Gbia aya, “Mi ayé na yo Basana yo berewe, mi ayé na yo berewe dudungura rago baime yo a,

²³si du oni ka zoga nduroni ti ni ku rogo kure, mirã gaoni aango ki bi gaami ahe be avuraroni.”

²⁴Ako Mbori, i nabi pa gamo anduge, nga agu anduge nga ga gi Mbori, nga gi Bakindo, ku rogo kparakpara ziazia ba yo―

²⁵abayango apere ku mbata yo, ataki akundi ki ngbe ku sa yo, ngasu ade nataki agaza ki du dagba yo:

²⁶“Oni sãmbua Mbori dagba bakere rimbasa aboro, nga Yekova, ako agu roni nga ngbatunga aYisaraere!”

²⁷Benyamina du yo ni bazogo nga umba ngbatungayo, na abazogo nga ga Yuda yo na gayo rimbasa, abazogo nga ga Zeburuna yo, na abazogo nga ga Nafatari yo a.

²⁸Ako Mbori, mo rúgu pa ga ome; Ako Mbori, mo nyákasi pa gu pai mo amangi fu rani.

²⁹Bambiko ga yekaru du Yerusarema yo si du abakindo aye ti ni na agamahe foro.

³⁰Mo zá agu anya naraka badumo yo, rimbasa abaabagara, na ga aboro wiri abagara. Mo símbi agu yo nakpi nyemu marã ku tii nduro yo; mo gbándaka agu yo ngba kina sovura ti yo.

³¹Airakumuko kúru Ezipeta yo; Etiopia ípisi tihe ka taã behe koyo du Mbori ni.

³²Ako oni nga angbi zegino, oni bí bia fu Mbori; oni bí bia atambuahe fu Gbia;

³³fu gu ko nandu ri angbangbaturũ nga agu angbangbaturũ naadu bakuru yo; oni ngére, ko nakusa fugoko, ni gako bakere fugo.

³⁴Oni niyá ome du ti Mbori, du gako iriwo ku ri Yisaraere, na gako ome du rogo angbangbaturũ.

³⁵Mbori du na kiki rogo gako kparakpara ba; nga ga aYisaraere Mbori, ko nafu ome fu gako aboro na tandu. Mbori dú ni sambuasambua ko!