Read zande Atambuahe 69 Bible Online

Atambuahe 69 - zande bible

Atambuahe 69

¹Ako Mbori, mo bátasi re; bambiko aime fu auru re.

²Mi narinda ku rogo ngbendengbende dogoro, yo adu nga ba rugo ni ya; mi zorõ ku rogo dudungura aime, yo fu aime ni ku auru re.

³Mi mbu be gi kparakpe; gorõre yo ugu. Bangire du tataita tipa sunguda mi gi Mbori.

⁴Agu yo nasoga re zanga nduhe i nge susi amangerire; agu yo naida ka gbarasa re, i du ni nyanyaki yo, i du ni agumbazire. Ka mi gasi gu he mi adĩ nga ha ya?

⁵Ako Mbori, mo ini pa gi mungo; gu kere pai dũ ku ri re si ni okooko ho ti ro te.

⁶Ako Gbia nga Mbori nga ga arimbasa ko, ka zee nimángi nga agu yo nasunguda ro mbiko gi pai ya; Ako ga aYisaraere Mbori, ka i niwási nga agu yo nagbata ro mbiko gi pai a ya.

⁷Bambiko mi ahi gbarasarimo tipa ro, si du wasiro azi kpakpure.

⁸Mi du wa kungba boro bangiri awirinami, wa kare fu awirinina.

⁹Bambiko nyemu ga bambu arika re arika, gu agbarasarimo i agbarasa rimoro na ni, si ati ku ri re.

¹⁰Ho mi akpari ni, ki rugu mbisimore na gina riahe, si adu ni pa gbarasarimo fere.

¹¹Ho mi ambakadi gi remu ni ni mbuzaroko, mi adu wa ũsanza fu yo.

¹²Agu yo nasunga ngbadimo bakporo i naapeka gi pai, akpibuda nasapa re ni bia.

¹³Ako Yekova, ono mi tigimi, gi kpetambuahe du foro, Ako Mbori, ti gu rago ngba angba, mo káraga pai fere wa du pa ga badungu weneringise.

¹⁴Mo bátasi re na gu rengo nga ga ga bata ka mi rínda nga ku rogo dogoro yo ya; mo bátasi re be agu yo nasoga re na be dudungura aime a.

¹⁵Ka ngirimo fu nga ku auru re ya, ka dudungura rago mbíri nga re ya, watadu ka due kísi nga ngbaha fuo re a ya.

¹⁶Ako Yekova, mo káraga pai fere; bambiko ga weneringise du ni wene he; mo káraga tiro kono du mi ni a wa du gamo wene nunga aboro ni badungu he.

¹⁷Ka mo óko nga kpakpuro ti vururo ya; bambiko mi ngba pai yo, mo káraga pai fere ni ipo.

¹⁸Mo mbédi na mi, ki tumo re, mo bátasi re bambiko ga avurare pai!

¹⁹Mo ini pa gayo gbarasa rimore, na pa gi zee na wasiro a; agu yo nafuda re mo ini yo dunduko.

²⁰Ngbadure kiti be pa gbarasarimo, si du omere bati. Mi ki ngere tipa nunga, ono boro adu nga ho sa te; tipa amounda a, ono mi abi nga yo wa sa te.

²¹I afu hĩhĩ kpepasio fere ni riahe, wa gomoro ime amanga re, i ki nifu kina kakaĩ imekakue fere.

²²Gayo mbisa dú ni nzingiri pai ku bara bangiriyo; ho i ka du ni zezeredi, si ki du wa kina gbina fu yo.

²³Bangiriyo dú na kina bitimo, ka i angera nga ya; ngba dimoyo kío dedede.

²⁴Mo úka ga imisiri ngbaduse ku ri yo, gu nzengerenzengere zinga nga gamo ki zi yo.

²⁵Kpuyo dú ni kina bate, ka boro rá nga rogo gayo abamburoko wa sa ya.

²⁶Bambiko i narungosi gu ni mo ata ni, i ninapeka pa gu rungo nga ga agu yo mo ahogi yo.

²⁷Mo kíisi mbusa irairapai fu yo ku ri kura mbusa; ka mo dí nga pai ri yo wa sa ya.

²⁸I gbándaka rimoyo rogo kitabu unga aboro; ka i ké nga yo ku dagba ruru aboro yo ya.

²⁹Ono mi ni rungosirungosi re na rogo imisiripai; Ako Mbori, ga bata túmba re ku ari!

³⁰Mi atámbua rimo Mbori na bibia; mi atáasa pa ko ni tambuahe.

³¹Gi angbá re ti Yekova susi babagara watadu gu babagara du na agbangaru na asukuturu a.

³²Rungosirungosi aboro bí he, ki ningi angi; agu roni nagbata Mbori, kpotoroni yo wása.

³³Bambiko Yekova nagia pa airazingo ahe, ko apayasi nga pa gako aboro du ni kisikisi yo te.

³⁴Ngbangbaturũ támbua ko atambua na kpotosende a, abaime, na agu ahe dunduko nandu rogo ho.

³⁵Bambiko Mbori abátasa Siona ki dudua ga aYudo abaakporo berewe; i anyé yo, si ki du ni gayo;

³⁶awiri avuruko adía ha ni gayo, agu yo nakpi nyemu rimoko i nikanye yo a.