Read zande Atambuahe 71 Bible Online

Atambuahe 71 - zande bible

Atambuahe 71

¹Ako Yekova, mi fu tire ku be ro; ka zee mángi nga re wa sa ya!

²Mo bátasi re ni ga rurupai, ki kusi re; mo yé turo kono du mi ni, ki batasi re!

³Mo dú ni nyanyaki banye fere, yo ka mi andu ku ho ni dedede; mo afu rugute tipa batasa re; bambiko mo nga gi mbia nga gi gbata.

⁴Ako gi Mbori, mo kúsi re be gbegberẽ boro, be irazanga rurupai nga irazuu.

⁵Ako Gbia, bambiko mo nga gi maabangirise, Ako Yekova, mo nga gu ko mi atona kida kuti ro mi du ni parangare.

⁶Mi asongodi tire kuti ro tona rago batika re; mo nga gu ko nakusi re rukumbu nina yo. Gi tambuahe du foro kindi.

⁷Mi du wa iiriwo yuguyugupai fu agu yo ni dungu yo; ono mo nga gi nyanyaki bagbuko.

⁸Ngbare hi ahi be tambua ro, na pa irisa ro na uru pitipiti.

⁹Ka mo bá nga re ku sa yo ti rago gbinza mi ya; ka mo mbú nga re ho omere ka nyasa ni ya.

¹⁰Bambiko avurare nagumba pai kuti re, agu yo nasunguda ungare i mongo gumba rondo re,

¹¹niya, “Mbori mbu ko; oni dó ko ki zi ko, bambiko a nga boro ho ka batasi ko te.”

¹²Ako Mbori, ka mo túrũ nga ti re ya; Ako gi Mbori, mo ípisi tiro ka unda re!

¹³Zee nimángi agu yo nga abakitingbangare, i nyási yo a; i niúkadi agu yo nagbata pa imisa re ni gbarasarimo na wasiro.

¹⁴Ono mi amáa bangire ku mbata yo kindi, ki tambua ro susi gu naadu mbata.

¹⁵Ngbare agumba pa ga ruru mangaapai, na pa ga bata na uru pitipiti, bambiko mi aina nga bange he te.

¹⁶Mi ayé na pa gu kangarã mangaapai nga ga Gbia Mbori, mi apé pa ga rurupai, nga boro gamo.

¹⁷Ako Mbori, mo atona yugo pai fere mi du ni parangare, mi nataka pande pa ga iiriwo mangaapai kindi.

¹⁸Ako Mbori, ho mi ka gbinza ni, mangerire ki du na nvue, ka mo mbú nga re ya, daho mi ka taka pande pa ga ngarã ni fu gu rika ngbatunga aboro nikaye.

¹⁹Ako Mbori ga rurupai na ga tandu si da ku angbangbaturũ ari yo. Ako Mbori, da du wa mo, namangi bakere apai?

²⁰Mo nga gu ko nayugu pa imisiri fudifudiapai fere ni dungu he, mo aúngasi re berewe; ki kusi re rogo dudungura arago kpotosende yo.

²¹Mo akíisa pa gi dunibahe, ki ngarãsi re berewe.

²²Mi atámbua ro na kindondo a, Ako gi Mbori, tipa pa ga rengo; mi abí bia atambuahe foro na nzenze, Ako mo nga ga aYisaraere Ziazia Ko.

²³Ngbare abí bia ni wawa na ngbarago ho mi ka bi bia atambuahe ni foro; mbisimore a, nga gu mo atumo.

²⁴Mirãre apéka pa ga rurupai na uru pitipiti a, bambiko zee namanga agu yo na mungo, naagbata pa imisa re.