Read zande Atambuahe 72 Bible Online

Atambuahe 72 - zande bible

Atambuahe 72

¹Ako Mbori, mo fú ga ruru sarangbanga fu bakindo, na ga rurupai fu wiri bakindo a!

²Ko sápu ngbanga fu gamo aboro na rurupai, na fu gamo rungorungo aboro ni ruru sarangbanga!

³Abaagangara yé na pa zereda fu aboro, na agangara a, ni rurupai!

⁴Ko dú ni basaringbanga fu airarungo, ka fu bata fu airazingo ahe, ki kuadi irarungosi!

⁵I gúnde ti ro wa nye uru ku ari yo, a wa nye diwi fu rika ngbatunga aboro dunduko kindi.

⁶Ko dú wa mai nana ku auru dede nvuo, a wa mai nanada kpotosende!

⁷Rurupai zúga ti ragoko, zereda ki du kpaima, daho diwi ka adu nga ni ho ya!

⁸Ko zógo rago tona ti gu baime dati kura baime, tona ti gu Di dati digida kpotosende!

⁹Agu yo sungu ngbakungba yo i túmusa fu ko, avurako síri nvutu sende!

¹⁰Abakindo Tarusisa na ga akisanga yo yé na rũhe fu ko, abakindo Seba na ga Seba ko yé na gamunihe fu ko!

¹¹Abakindo dunduko tíwi ku bara bangiriko, arikaaboro dunduko rá fu ko!

¹²Bambiko ko nabatasa irazingo ahe ho ni nakpara ni ku ari; na irarungo na gu ni adu nga mounda ti ni ya.

¹³Nunga rurungbura boro du ti ko na irazingo ahe a, ko nabanda unga airazingo ahe.

¹⁴Ko natumo ungayo be bau pai na zuu; kureyo ki du ni kikiipa he bangiriko.

¹⁵Ko nyé ni ungako ni gbanga ha, i fú gu dahabu fu ko du Seba yo! Aboro nikpári tipa ko dedede, i sána he tipa maku tipa ko na uru pitipiti!

¹⁶Zende ahe zúku rogo ringara kpaima; si wó ri abaagangara yo; gaha zuzuhe dú wa Rebanona; agu aboro du abaakporo yo zúga wa nvuo nakura ti sende!

¹⁷Rimoko nyé anye kindi, wo rimoko nyé wa nye uru! Aboro sámbua tiyo mbiko ko, arikaaboro dunduko yá ti ko boro maku!

¹⁸Yekova nga Mbori dú ni sambuasambua ko, nga ga aYisaraere Mbori, kina gu ko namanga iiriwo apai.

¹⁹I sámbua rimoko du ni taasitaasi he nye anye kindi; gako taarimo hísi zegino dunduko! Amina, na Amina!

²⁰Akpetambuahe nyasi nga ga Dawidi wiri Yisai.