Read zande Atambuahe 73 Bible Online

Atambuahe 73 - zande bible

Atambuahe 73

¹Mbori du ni wene ko fu aYisaraere ni rengo, fu agu yo du kpotoyo yo ziazia.

²Ono mi tigimi, ndure ambedi ka kpara ku bani, kpandure ambedi ka zerenga.

³Bambiko mi akpi pai kuti airarekangose, ho mi anabi ga gbegberẽ aboro zereda ni.

⁴Bambiko a nga kpioyo na ima ti ni te; ono kpotoyo du na ome ki du rõrõrõ.

⁵I na fuda wa kura aboro te; i ni mbusimbusi yo wa kura aboro a te.

⁶Si du du enda ti ni gorõyo wa ũfongo; zuu naadada yo wa remu.

⁷Bangiriyo du ni gbafugbafu he be nzeme, ahe be yo susi gu he kpotoyo yo akpi nyemu he.

⁸I naamoma aboro, nipe gbigbitapai na rungosi; i naagumba pai ni abiatise.

⁹I nandukanya ngbayo kuti angbangbaturũ, fugoyo naata rogo kpotosende.

¹⁰Si du gako aboro nakaraga tiyo ti ni kono; gu ime hi inga si nyoto be yo.

¹¹I ki ya, “Mbori aina ha waĩ? Inahe du ti gu Ko nga Bahe ki susi?”

¹²Oni ngére, agi yo re nga gbegberẽ aboro; wa du yo zezeredi dedede, ũkumuko nange be yo.

¹³Ni rengo mi vura girisa kpotore yo vurũ, ki zundu bere wa du mi nga boro wenesa.

¹⁴Bambiko mi ni mbusimbusi re na uru pitipiti, ni takitaki re na wiso a.

¹⁵Ka mi aya, “Mi agumba pai were,” si ki du wa ka mi amangi pai ni biriki fu rika ngbatunga awiro.

¹⁶Ono ho mi aberẽ pai ni ya waĩ ka mi rugu tire na ni, si adu ni fudifudipai bangire ki susi,

¹⁷daho mi arimi ni ku rogo ga Mbori kparakpara ziazia ba, ki niberẽ pa digida gayo pai.

¹⁸Mo namaa yo rogo zezerenge rago ni rengo; mo namanga yo i tiwi ku sande sa gbarasa yo.

¹⁹I gbarasi yo ni ba sa, ki ba tungayo kpakaya ni gbudagbuda!

²⁰Wa musumo nigo ti boro ho ni nizingi ni rame yo, Ako Gbia, kina wo mo ka payasi kirima yo ho mo ka zinga ni.

²¹Ho mbisimore arungo ni, pai ki rũ re kpotore yo,

²²mi adu ni iramungo, ki zanga inahe, mi ki du wa nya ku bara bangiro.

²³Wa si avura du wo mi du na mo kindi; mo nazada kumbabere.

²⁴Mo nagasa re na sangbaro, ku mbata yo mo adía re sa taarimo.

²⁵Da du fere ngbangbaturũ yo berewe fuo kina ro? A nga gu ni sa auru kpotosende ngba ti re ki susi ro te.

²⁶Borore nanyasa na kpotore yo a, ono Mbori nga ga kpotore yo ũnyaka nga gi ũkumuko nye anye kindi.

²⁷Si du mo ngére, agu yo turũ aturã na mo gbe i akpíka; mo nagbarasa agu yo dunduko nakpara ti ro nimangi pai ni sino pa bari.

²⁸Ono si ni wene he fere ka mbeda na Mbori; mi moi Gbia nga Mbori ni gi bagbuko, ya mi taki pande pa gamo asunge dunduko.