Read zande Atambuahe 74 Bible Online

Atambuahe 74 - zande bible

Atambuahe 74

¹Ako Mbori, tipagine bafu mo rani ti ni ku sa yo nye anye kindi? Tipagine ga zinga naagunda ti ni kuti akandoro ga banambu?

²Mo tíngidi pa ga rimbasa aboro, nga agu yo mo angbe yo bakuru yo, nga agu yo mo atumo yo i du ni gamo siasia aboro! Mo tíngidi pa Bagangara Siona, yo mo anye ni.

³Mo rúgu pa ga nduge ki ye ku kurugbo rago no nga nyebaru; iravura agbarasi ahe dunduko rogo kparakpara ziazia ba!

⁴Agu yo nafuda ro apoi ku ari rogo ga badungurati; i amoi kina gayo yuguyuguapai ku ari ni yuguyuguahe.

⁵I adu wa agu yo naatumba amangua ku ari kuti nanaga angua.

⁶Gu sese ngua re dunduko i naadewa ba ku sande na amangua na abande.

⁷I azokodi ga kparakpara ziazia ba; i apayasi gu ba du rimoro rogo ho na sende a.

⁸I ki ya ku kpotoyo yo, “Ani agbárasa ha dunduko”; i azokodi ga Mbori abambutiria ringara yo dunduko.

⁹Ani abi nga gaani yuguyuguapai te; nebi adu nga ho berewe te, a nga boro sa dagba rani ini pa ragoho ya waĩ du he te.

¹⁰Ako Mbori, rago adú waĩ irafudifudipai nigbarasi rimoro? Iravura agberã ngbani yo kuti rimoro nye anye kindi?

¹¹Tipagine mo nadia bero ti ni ku sa yo, nga boro kumbabero! Mo dí he ti ngbaduro ki nyasi yo.

¹²Ono Mbori nga gi Bakindo naadu ho bakuru yo, namanga pa bata rogo kpotosende no.

¹³Mo akparaka rogo baime ni ga ome; mo akuadi ri anyaime du wa kpaka ime yo.

¹⁴Mo akuadi ri gu bakere nyaime rukutu, mo anafu ru u du ni riahe fu agu aboro naraka ngbakungba yo.

¹⁵Mo asapu gene gugaabi na adi; mo augusi bafufu adi.

¹⁶Uru du ni gamo he, na yuru a; mo afu imarago na uru a.

¹⁷Mo aringbisi bangbanda kpotosende; mo aringbisi garã na kito a.

¹⁸Ako Yekova, mo tíngidi pa gere, ya iravura nagbarasa rimoro, mumungo aboro nagberã ngbayo yo kuti rimoro.

¹⁹Ako, ka mo nifu nga mbisimo ga mbipo ku be anyarinde ya; ka bangiro nigo nga tipa unga ga rungorungo aboro nye anye kindi ya.

²⁰Mo írisi pa ga mokido; bambiko agu aba du na bitimo kpotosende no hi be agu akporo nga ga airazuu.

²¹Ako, ka payasipayasi aboro yega nga na wasiro ya; airarungo tambua rimoro atambua na airazingo ahe a.

²²Ako Mbori, mo guari ki kpari tipa gu ngbanga du ni gamo; mo tíngidi pa ha a wa mumungo aboro nagbarasa rimoro na uru pitipiti!

²³Ka fugo agu yo nafuda ro nigo nga bangiro ya, gu tatangba nga ga agu yo nasa mungu kuti ro si napaa ku ari kindi!