Read zande Atambuahe 77 Bible Online

Atambuahe 77 - zande bible

Atambuahe 77

¹Mi nakpara ni wawa fu Mbori, ni wawa fu kina Mbori, ya ko gi fugore.

²Rago gi fudifudipai mi nagbata Gbia; mi nataã bere yuru sasasa, ka mi azoga nga ha ya; mbisimore ka pa wasa.

³Mi natingida pa Mbori, ki du ni fudifudi re; mi nabaka bangire, he nimaki torore amaka.

⁴Mo naza bangire be rame; mi ni fudifudi re mi arengba nga ka fura te.

⁵Mi naberã pa agu arago naadu bakuru yo, na agu agarã naasusi koyo a.

⁶Mi natingida pa gi bia na yuru; mi nabaka bangire ku kpotore yo, torore ki niwisigi pai sirisiri:

⁷“Gbia ba rani ku sa yo kindi, ko angba nga na ani berewe te?

⁸Gako weneringise digi kindi? gako akidohe nakpa nye anye kindi?

⁹Bangiri Mbori go tipa ina pai fu aboro? Ko kisi gako wene nunga aboro ni zinga?”

¹⁰Mi ki ya, “Gere nga gi ima; ono mi atingida pa agu apai du ti kumbabe gu Ko nga Bahe ki.”

¹¹Mi agúmba pa ga Yekova mangaapai; ii, mi atíngida pa gu ga banaru apai naadu bakuru yo.

¹²Mi amákia pa ga sunge dunduko a, ki nibaki bangire tipa ga mangaapai.

¹³Ako Mbori, ga pai dũ ni kparakpara ha ziazia. Gini mbori du ni bakere mbori wa gaani Mbori?

¹⁴Mo nga Mbori namanga banaru apai, mo ayugu pa ga ome ku dagba aboro.

¹⁵Mo atumo gamo aboro ni bero, nga awiri Yakoba na awiri Yosefa.

¹⁶Ako Mbori, ho aime abi ro ni, ho aime abi ro ni, si agunde, ii, dudungura arago ki nikio a.

¹⁷Mai ari yo auka ime; mai angbangbaturũ akusi pa gumba; gamo asiida ki ikpira rogo arago dunduko.

¹⁸Sumba ga gumba adu rogo bakamikami yuge; gamo aikpira gumba ahasi rago zegino; kpotosende akio ki nizigizo tihe.

¹⁹Ga gene adu rogo abaime yo, ga gene ki du rogo bakikingidi aime a, i aina nga fuo nduro te.

²⁰Mo angbe ku mbata yo fu gamo aboro wa rimbasa anya ku be aMose na Arona.