Read zande Atambuahe 78 Bible Online

Atambuahe 78 - zande bible

Atambuahe 78

¹Ako gimi aboro, oni yé turoni sa gi rugute; oni dege turoni sa agu apai du ngbare!

²Mi aza ngbare na sanza; mi agúmba kuru okooko apai,

³nga gu ani agi he ki ini he, a wa abarani agumba ha fu rani.

⁴Ani aóka nga ha ti awiriyo te, ono ani ayúgo pa tambua Yekova na pa gako ngarã fu gu rika ngbatunga aboro nikaye, na gu iiriwo mangaapai ko amangi.

⁵Ko afu dezirepai ku Yakoba yo, ki fu rugute ku Yisaraere yo, nga gu ko arugu abarani na ni, ka yugo ho fu awiriyo;

⁶si du gu rika ngbatunga aboro nikaye ki ini he, nga agu awiriyo i ka batika yo, ki nitaki pande pa ha fu awiriyo a,

⁷ya i mói bangiriyo ti Mbori, ka bangiriyo nigó nga ti ga Mbori mangaapai ya, ono kina ka kuti sangbako;

⁸ka i adú nga wa abayo nangia rika ngbatunga airanyakari na airasamungu a ya, nangia gu rika ngbatunga aboro naambakada nga kpotoyo yo nzunzu ya, ka toroyo adu nga yososo fu Mbori a ya.

⁹Ngbatunga Efuraima naadu na ũvura be yo na mboto, i akaraga tiyo ku sa yo rago vura.

¹⁰I aka nga kuti ga Mbori zungahe te, ono i aka pa ta ku sangba gako rugute yo.

¹¹Bangiriyo ago ti gako mangaapai, na gu gako iiriwo mangaapai ko ayugo ho fu yo.

¹²Ko amangi banaru apai ku bangiri abayo, ringara Ezipeta yo na rogo ati Soana yo a.

¹³Ko akparaka rogo baime, ya i susi dagba ha, ko arugu aime si ru ku rogo badona ha sa.

¹⁴Ko anangbe ku mbata yo fu yo a uru rogo dubo, yuru sasasa na ima we.

¹⁵Ko asari ambia ngbakungba yo, ki fu ime fu yo kpaima a wa si nikuru dudungura rago yo.

¹⁶Ko akusi wiriadi ti mbia, ki niuka aime si gbadi wa adi.

¹⁷Ono i adogoda na manga ingapai kuti ko kindi, ki nisa mungu ngbakungba yo kuti gu Ko nga Bahe ki susi.

¹⁸I aasadi Mbori kpotoyo yo nisana he tipa pasio ni gayo nyemuhe.

¹⁹I agumba pai kuti Mbori, niya, “Mbori rengbe na mbakada mbisa ngbakungba no?

²⁰Ko anari mbia, aime ki nigbadi ti ni kpua, wiriadi ki nigbadi buza. Ono ko rengbe na fu riahe a, watadu fu pasio tipa gako aboro?”

²¹Si du Yekova azingi ti ni, ho ko agi he ni; we arungudi kuti Yakoba, zinga ki rungudi kuti Yisaraere a;

²²bambiko i aida nga pa ga Mbori rengba na pai te, i akida nga kuti pa gu tandu nga ga gako bata a te.

²³Ko avura ruga mai ari yo vurũ, ki za angbadimo ngbangbaturũ;

²⁴ko auka manu ari yo ku ri yo i niri he, ki nifu gu zende ahe nga ga ngbangbaturũ fu yo.

²⁵Aboro ari gu riahe nga ga airanyaka, ko akedi pasio fu yo i mbiki ambika.

²⁶Ko akusi yuge uroyo si ye angbangbaturũ yo, ko arugu yuge si ye sudiyo ni gako ome;

²⁷ko auka pasio ari yo fu yo wa nvutu sende, na azire wa ngume abaime;

²⁸ko aidi ami tiwi ku dagba gayo bataya, na pati gayo abasura kirikiri.

²⁹Si du i ariki he, ki mbiki gbe, bambiko ko afu gu he fu yo i akpi nyemu he.

³⁰Ono wa nyemuhe ago nga ti yo ya, pasio adu kina ku ngbayo yo,

³¹ga Mbori zinga ki rungudi kuti yo, ki imi gu banyanyaki yo, ki bafu aparanga aYisaraere ku sande.

³²Ono wa si avura du wo i ainga pai kindi; ka i aida nga pa gako iiriwo mangaapai ya.

³³Si du ko anyasi gayo arame ti ni wa uturangba, na gayo agarã rogo bakere gunde.

³⁴Ho ko anyasi yo ni, i ki nisasana he tipa ko; i ki karaga tiyo ki gbata Mbori sirisiri.

³⁵I ki tingidi he ya Mbori du ni gayo mbia, nga gu Ko nga Bahe ki susi, du ni batumo yo.

³⁶Ono i avuro ko ni ngbayo; ki gumba zire fu ko ni mirãyo.

³⁷Bambiko kpotoyo yo adu nga fu ko yososo te; ka i ara nga ni rengo fu gako zungahe a ya.

³⁸Ono wa hi ko ahi be nunga aboro, ko anavu yo avu tipa gayo irairaapai, ka ko agbarasa nga yo ya; ko anasa gako zinga ti yo ku sa yo dedede, ko azingisa nga gako erã dunduko kuti yo te.

³⁹Bambiko ko atingidi he ya i nga kina borose, a wa yuge nasusa, ka si asa nga tihe berewe ya.

⁴⁰Na nge agu arago i anasa mungu kuti ko ngbakungba yo, nirungosi ko kpatakpari yo!

⁴¹I aasadi Mbori berewe na berewe, ki nizíngisi ga Yisaraere Ziazia Ko.

⁴²I atingida nga pa gako tandu te, na pa gu uru ko atumo yo be agu yo nafudi yo te;

⁴³ho ko amangi gako yuguyugupai ni Ezipeta yo, na gako iiriwo yuguyuguapai rogo ati Soana yo.

⁴⁴Ko ki sa gayo adi ni kure, na gayo wiriadi a, i arengba nga ka mbira ha te.

⁴⁵Ko akedi wangu azii ku dagba yo, ami arunduku yo, na adari, ami ki gbarasi yo.

⁴⁶Ko afu gayo aũati fu arume, ayere ariti aũbeyo.

⁴⁷Ko aimi gayo giri bakakue ni morogumba, na gayo ngua du wa vurumo na bazezere kputakputa nduro.

⁴⁸Ko afu gayo zogozogo anya fu morogumba, na gayo rimbasa anya fu fafoi mangua gumba.

⁴⁹Ko anauka gu nzengerenzengere zinga nga gako ku auru yo, na dingidingi ngbaduse na imisiri ngbaduse, na fudifudipai a, na rika amaraika naye na gbigbitapai ku ri yo.

⁵⁰Ko ambakadi gene tipa gako zinga; ko abatasa nga mbisimoyo be kpio te, ono ko anafu ungayo fu gberãngbi.

⁵¹Ko ki iimi bambata avungu Ezipeta yo dunduko, nangia gayo tonatona ome rogo ga Ama abamburoko yo.

⁵²Ono ko angbe ku mbata yo fu gako aboro wa fu akandoro, ki nigasi yo ngbakungba yo wa rimbasa anya.

⁵³Ko angbe ku mbata yo fu yo wenengaĩ, si du i agunde nga ti ni ya; ono baime afu ku ri avurayo.

⁵⁴Ko ki ye na yo ku ngbanda gako kparakpara ziazia ringara, koyo du gu bagangara ni nga gu kumbabeko angbe he.

⁵⁵Ko adandi arikaaboro yo barangba yo a; ki kparaka ringara fu yo ni ringbisiringbisi he, ki mamoi angbatunga aYisaraere i susungu rogo gayo abamburoko.

⁵⁶Ono i aasadi gu Mbori nga Bahe ki susi, ki nisa mungu kuti ko, i aka nga kuti gako adezirepai te,

⁵⁷ono i akaraga tiyo ku sa yo, ki nimangi biriki wa kina abayo, ki nyaga tiyo ku bani wa gu mboto ira aira.

⁵⁸Bambiko i azingisi ko sa zinga tipa gayo tumbatumba arago; ki nizíngisi ko sa deringo ni gayo sese kpiaahe a.

⁵⁹Ho Mbori agi gi pai ni re, ko azingi gbe, ki gindiga aYisaraere kpakaya.

⁶⁰Si du ko ambu gu gako banye naadu Siro yo, nga gu bamburoko ko amoi dagba aboro,

⁶¹ki fu gako ome si du ni zizi he, na gako taarimo ku be irafudifudipai.

⁶²Ko afu gako aboro ku ngba basape a, ki mangi gako aboro ni zinga.

⁶³We ariti gayo aparanga, bia rogatise adu nga tipa gayo paranga ade te.

⁶⁴Gayo aboromotumo akpiki ngba basape, gayo adekurugbo akpara nga a te.

⁶⁵Gbia ki zingi tie wa boro nizingi rame yo, wa iranyaka nazo wawa be imekakue.

⁶⁶Ko agbandaka agu yo nafudi ko ku sa yo; ki nisa yo ni aboro zee nye anye kindi.

⁶⁷Ko agindiga pa ga Yosefa bambu roko, ko asia nga ngbatunga Efuraima te;

⁶⁸ono ko asia kina ngbatunga Yuda, na Bagangara Siona nga gu ko nakpi nyemu he.

⁶⁹Ko adua gako kparakpara ba wa tumbatumba aba, wa kina kpotosende nga gu ko amangi si nye anye kindi.

⁷⁰Ko asia Dawidi a ni gako moyambu, ki di ko rogo andugu akandoro yo;

⁷¹ku ba peka fuo anaakandoro naaga awira ko aye na ko, ko nirigi Yakoba nga gako aboro, nga aYisaraere nga gako siasia yo.

⁷²Si du ko arigi yo ti ni ku sangba gu rurupai naadu ku kpotoko yo; ki ningbe ku mbata yo fu yo ni gu rubangirise nga ga beko.