Read zande Atambuahe 79 Bible Online

Atambuahe 79 - zande bible

Atambuahe 79

¹Ako Mbori, arikaaboro aye ku rogo ga ringara; i abirikosi ga kparakpara ziazia yekaru; i aba Yerusarema wa guguda gbarasigbarasi ane.

²I afu kangba gamo amoyambu ni pasio fu agu azire du ari yo, na pasio gamo ziazia aboro fu anya sende no.

³I auka kureyo wa ime pati Yerusarema kirikiri; boro adu nga ho sa ka kpisida yo te.

⁴Ani du ni ũgbarasarimo fu akuarani, ni ũumohe na ũmongo ngba agu yo du pati rani kirikiri.

⁵Ako Yekova, rago adú waĩ mo nizingi kuti rani kindi? Ga zinga deringo agbí wa we?

⁶Mo úka ga erã ku ri agu arikaaboro ata ina nga ro ya, na ku ri agu angbi ata kpara nga ti rimoro a ya!

⁷Bambiko i ariti Yakoba, ki gbarasi gako baraka.

⁸Ka mo nitíngidi nga pa ga atitarani irairaapai kuti rani ya; mo niídi gamo wene nunga aboro gbia rani ni ipo, bambiko i aumbasi pa rani gbe.

⁹Ako Mbori nga gaani bata, mo únda rani, mbiko gu taarimo nga ga rimoro, ki batasi rani, ki girisi gaani ingaapai ku sa yo, mbiko rimoro!

¹⁰Tipagine arikaaboro ka aya ti ni, “Wari du gayo Mbori ni?” Mo niyúgu irabape kure gamo amoyambu fu arikaaboro ku bangirani nga gu i auka ha!

¹¹Mo niídi he gu uko nga ga zizi aboro si niye ku bara bangiro; mo banda agu yo i asia yo sa kpio ku sangba gu bahe nga ga omero!

¹²Mo karága ga akuarani úgbarasarimo ku ngbaduyo yo wa bara saba, Ako Gbia, a wa i agbarasi rimoro!

¹³Si du ani nga gamo aboro nga akandoro ga banambu afú tambuahe ti ni foro nye anye kindi; ani ayúgo pa tambua ro fu rika ngbatunga aboro dati gu kura rika ngbatunga aboro.