Read zande Atambuahe 81 Bible Online

Atambuahe 81 - zande bible

Atambuahe 81

¹Oni ngbiko fu Mbori nga gaani ome; oni tá ngbaroni ni ngbarago fu ga Yakoba Mbori!

²Oni tóna bia tambuahe, ki ye na gaza, na wene nzenze na kindondo a.

³Oni vúdi mbanya rago fogo diwi, na ho du diwi ni ni kpakpu bandima, rago gaani iiriwo pumbo.

⁴Bambiko si du ni rugapai fu aYisaraere, nga gu sapangbanga nga ga ga Yakoba Mbori.

⁵Ko aasia pa ha fu Yosefa ni dezirepai, ho ko akuru ni ku ringara Ezipeta yo. Mi anigi fugo boro ka mi aina nga ha ya:

⁶“Mi arogo tindiro pagorõko; beko ki zeredi be zada abaga.

⁷Mo akpari fere ti rago fudifudipai, mi ki batasi ro; mi anakaraga pai foro rogo ga gumba barondo su yo; mi aini ro tipa wisiga ro pati aime Meriba yo.

⁸Ako gimi aboro, oni gí he, mi nayugo dezirepai fu roni! Ako Yisaraere, ka mo agia sangbare!

⁹Ka kungba mbori dú nga be ro wa sa ya; ka mo írisi nga ga auro mbori a ya.

¹⁰Mi nga Yekova nga ga Mbori, nakusi ro ringara Ezipeta yo. Mo zá ngbaro gbagaza, mi ahísa ha.

¹¹“Ono gimi aboro agia nga fugore te; aYisaraere aida nga na mi a te.

¹²Si du mi aidi he ti ni fu yo i nipeke gu nyemuhe du kpotoyo yo, ka ta kina rogo sangbayo.

¹³Ako ka gimi aboro agia sangbare, ka Yisaraere ata ngba gimi agene!

¹⁴Si ka mi azoga avurayo ti ni ni ipo, ki nisa bere kuti agu yo nafuda yo.

¹⁵Asogo Yekova ki niraki fu ko, ono gayo pai anye anye kindi.

¹⁶Ka mi ariga ro na wene fufurũ zende ahe, na nzeme anyege mbia ka mi ambisa ro na ni.”