Read zande Atambuahe 84 Bible Online

Atambuahe 84 - zande bible

Atambuahe 84

¹Ako Yekova nga ga arimbasa ko nangba gamo abanye!

²Mbisimore nakpi nyemu ga Yekova avufukporo, ii, he namaka re tipa ha a; kpotore yo nangbiko na borore a tipa unga Mbori.

³Ii, bavurukporo nabi bambu ru, mbirambira nabi bambu tipa ru a, yo u ka ma pararu ku ho ni, nga gamo abamotumo, Ako Yekova nga ga arimbasa ko, gi Bakindo nga gi Mbori.

⁴Aboro maku nga agu yo nanye rogo ga bambu yo, ninatambua ro kindi!

⁵Aboro maku nga agu yo du gayo ome rogo ro yo, pa abaagene Siona du kpotoyo yo.

⁶Wa i nasusa rogo Ngboongboorago Baka yo i nasa ha ni ba agugaabi; bambata mai naanada ha na maku.

⁷I nasusa na ngarã ku ri ngarã; i dunduko naye ku bara bangiri Mbori ku Siona yo.

⁸Ako Yekova Mbori nga ga arimbasa ko, mo gí gi kpetambuahe; Ako ga Yakoba Mbori, mo yé turo kono du mi ni.

⁹Ako Mbori, mo ngére gaani vurakube, ki ngere kuti kpakpu ga mbedimbedi boro!

¹⁰Bambiko uru sa rogo gamo avurukporo ngba susi 1,000 rogo kura ba. Si angba ti re ka du ni babanda angbadimo ga gi Mbori bambu, susi ti sunga mi rogo ga gbegberẽ aboro bamburoko.

¹¹Bambiko Yekova Mbori du wa uru na vurakube; Yekova nafu undahe na taarimo. A nga wene he sa ka ko aka na ni be agu yo nata nzunzu te.

¹²Ako Yekova nga ga arimbasa ko, boro maku nga gu boro nakida kuti ro!