Read zande Atambuahe 86 Bible Online

Atambuahe 86 - zande bible

Atambuahe 86

¹Ako Yekova, mo dége turo kono du mi ni, ki karaga pai fere, bambiko mi du ni rungorungo re na zingo ahe a.

²Mo bánda ungare, bambiko mi du na sinombori; Ako, mo nga gi Mbori, mo bátasi ga moyambu nakida kuti ro.

³Ako Gbia, mo íni pai fere, bambiko mi naakpara fu kina ro na uru pitipiti.

⁴Mo ngíisi mbisimo ga moyambu, Ako Gbia, bambiko mi ninatumba mbisimore koyo du mo ni.

⁵Ako Gbia, bambiko mo du ni wene ro, ki du zaza tipa vu aboro, ki du na weneringise kpaima fu agu yo dunduko nakpara foro.

⁶Ako Yekova, mo yé turo sa gi kpetambuahe; ki gi pa gimi akpesarawati.

⁷Rago gi fudifudipai mi akpara fu kina ro, bambiko mo akaraga pai fere.

⁸Ako Gbia, kura ambori adu nga ho wa mo dagba ambori te, a nga kura mangaapai ho du wa gamo mangaapai a te.

⁹Ako Gbia, agu arikaaboro dunduko mo amangi yo i ayé ka fu irisa bara bangiro, i atáasa rimoro.

¹⁰Bambiko mo nga bahe, mo namanga iiriwo apai, kina ro sa nga Mbori.

¹¹Ako Yekova, mo yúgu ga gene fere, mi nita kina rogo ga rengo; mo kpámia kpotore yo si gunde ti rimoro.

¹²Ako Gbia gi Mbori, mi natambua ro na kpotore yo dunduko, mi atáasa rimoro nye anye kindi.

¹³Bambiko ga weneringise du ni bakere he kono du mi ni; mo abatasi mbisimore be gu dudungura rago du Baatoro kpikpi aboro yo.

¹⁴Ako Mbori, airaenda amo kuti re; ga airazuu dungurati agbata ungare, i aberã nga pa ro wa sa te.

¹⁵Ako Gbia, ono mo nga Mbori, du na nunga aboro na inapai a, aipo nga na zinga ya, ki du na weneringise kpaima na rengo.

¹⁶Ako, mo káraga tiro kono du mi ni, ki ini pai fere; mo fú ga ome fu ga moyambu, ki batasi wiri ga kanga nga de.

¹⁷Mo yúgu yuguyugupai fere nga ga ngba na mi, ya agu yo nasoga re i bi he, zee ki zi yo bambiko mo, Yekova naunda re, ki ningarãsi re.