Read zande Atambuahe 89 Bible Online

Atambuahe 89 - zande bible

Atambuahe 89

¹Mi abí bia tipa pa ga Yekova weneringise nye anye kindi; mi ayúgo ga yososopai ni ngbare fu arika angbatunga aboro dunduko.

²Bambiko ga weneringise adu ni nyakasinyakasi he nye anye kindi, ga yososopai ni nyanyaki he wa angbangbaturũ.

³Mo aya, “Mi amangi mokido fu gi siasia boro, mi azunga he fu Dawidi nga gi moyambu:

⁴‘Mi anyákasa ngbatungaro nye anye kindi, ki dua ga mbatabakindo dati arika angbatunga aboro dunduko.’ ”

⁵Ako Yekova, angbangbaturũ támbua ga banaru apai, na ga yososopai dagba rimbasa agu aboro nga ga kparakpara ziazia yo a!

⁶Da du mai yo ngbangbaturũ yo ka i ringbisi ni na Yekova? Da du dagba awiri airatandu wa Yekova?

⁷nga gu Mbori du na kiki dagba agu abororondo nga ga kparakpara ziazia yo, i ka gunde ti ko susi agu yo du pati ko kirikiri.

⁸Ako Yekova Mbori nga ga arimbasa ko, da du ni iranyaka wa mo, Ako Yekova, du ga yososopai pati ro kirikiri?

⁹Mo naruga gu sungbura nga ga baime; ho ngambiringambiri ime niru ni ku ari, mo ninazeresa ha.

¹⁰Mo akuadi Ezipeta rukutu, wa kangba; mo agbandaka avuraro ni nyanyaki bero.

¹¹Angbangbaturũ nga gamo, kpotosende nga gamo a; mo namoi mburu zegino, na agu ahe du rogo.

¹²Mo afu rago ku nodiyo, na ku sudiyo; aTabora na Erumona angbiko ti rimoro.

¹³Mo du na banyanyaki bero; kpatabero du na ome, kumbabero ki du ku ari.

¹⁴Rurupai na ruru sarangbanga du ni mburu ga mbatabakindo; weneringise na rengo ki ngbe ku mbatayo foro bara kpakpuro

¹⁵Aboro maku nga agu yo naina woro ngbiko ngbarago, Ako Yekova, i nata rogo ima kpakpuro,

¹⁶nga agu yo nadu pusiapusia mbiko rimoro na uru pitipiti, i nakiisa pa tiyo na ga rurupai.

¹⁷Bambiko mo nga ga omeyo taarimo; mbiko ngbanyaro pa gaani ome du ni kiisikiisi he.

¹⁸Bambiko Yekova nga gaani vurakube, ga Yisaraere Ziazia Ko nga gaani bakindo.

¹⁹Mo agumba pai rogo musumo fu ga ziazia ni, ki ya: “Mi amoi undahe ku ri gu ni nga iranyaka, mi akiisi pa gu siasia ni dagba aboro.

²⁰Mi abi Dawidi nga gi moyambu; mi ambedi ko na gi kparakpara ziazia nzeme;

²¹nga gu ko bere ka nye ti ko kindi, bere angárãsa ko a.

²²Iravura adía nga be ko te, wiri gbegberẽ boro arúngosi nga ko a te.

²³Mi atáka agu yo ku sande bara bangiriko nafuda ko, ki nigbarasi agu yo nasoga ko.

²⁴Ono gi yososopai adú fu ko na gi weneringise, i akíisa pa gako ome ti rimore.

²⁵Mi amáa beko ku auru baime, na kumbabeko ku auru adi a.

²⁶Ko akpára fere, ki ya, ‘Mo nga Buba, nga gi Mbori, nga gu Mbia nga ga gi bata.’

²⁷Mi asá ko ni bambata vungu a, ku ari susi abakindo zegino dunduko.

²⁸Mi aká kuti gi weneringise fu ko nye anye kindi, gi zungahe adú fu ko ku ba ha kindi.

²⁹Mi anyákasa ngbatungako a si nye anye kindi, na gako mbatabakindo wa du arame ku angbangbaturũ yo.

³⁰Ka awiriko ambú gi rugute, ka i atá nga rogo gimi asarangbanga ya;

³¹ka i apáyasi gimi rugaapai, ka i aká nga kuti sangbare a ya,

³²si du ka mi mbusi yo ti ni tipa gayo samungu na angbangbaki, na gayo irairaapai na amandoro;

³³ono mi adía nga gi weneringise ti ko dunduko te, mi aída nga pa gi yososopai si kpa a te.

³⁴Mi apáyasi nga pa gi zungahe te, mi asá nga gu pai naakuru ngbare yo a te.

³⁵Mi azunga he bara sa kindi ni gi kparakpara ziazia pai; mi aré nga zire fu Dawidi te.

³⁶Ngbatungako anyé anye kindi, na gako mbatabakindo a wa du uru ku bara bangire.

³⁷Mi anyákasa ha si nye anye kindi wa du pa diwi, nga gu nyanyaki dezirepai du ngbangbaturũ yo.”

³⁸Ono mo abafu yo ku sa yo ki gindiga yo, mo azingi fu ga mbedimbedi boro.

³⁹Mo asa pa gu mokido du tipa ga moyambu ni kungba he; mo apayasi pa gako kpakpari bakindo ki ba ha ku sande.

⁴⁰Mo akuadi gako angapa bakporo dunduko; mo agbarasi gako nyanyaki agbata.

⁴¹Agu yo nasusa ngba gene i namanga ko; ko du ni ũgbarasarimo fu akurako.

⁴²Mo atumba kumbabe agu yo nafuda ko ku ari, mo aya avurako ngi dunduko.

⁴³Ii, mo adi rindi gako basape ku sa yo, mo anyákasa nga ko ko ru rago vura te.

⁴⁴Mo anyasi pa gako taarimo, ki ba gako mbatabakindo ku sande.

⁴⁵Mo agurusi rago parangako; mo aba zee ku ri ko.

⁴⁶Ako Yekova, rago adú waĩ, mo nioko tiro nye anye kindi? Rago adú waĩ ga erã nigbi wa we?

⁴⁷Ako, mo tíngidi pa aragore wa du he ni kina guru he, tipagine fu mo awiri aboro ti ni dunduko tipa kungba pai!

⁴⁸Gini boro rengbe ka du ni ungani ka ni abi nga kpio ya? Da rengbe na batasa mbisimoni be tandu Baatoro kpikpi aboro?

⁴⁹Gbia, wari du ga bambata weneringise ni, nga gu mo azunga he tipa ha fu Dawidi ni ga yososopai?

⁵⁰Ako Gbia, mo tingidi pa gu gbarasarimo du fu ga moyambu; a wa mi nahi pa gu gbarasarimo nga ga dungu aboro ku ngbadure yo,

⁵¹nga gu avuraro agbarasi rimoro na ni, Ako Yekova, nisawia fuo ndu ga mbedimbedi boro na ni.

⁵²Yekova dú ni sambuasambua ko nye anye kindi! Amina na Amina.