Read zande Atambuahe 9 Bible Online

Atambuahe 9 - zande bible

Atambuahe 9

¹Mi afú atambuahe fu Yekova na kpotore yo dũ; mi ayúgo pa ga iiriwo mangaapai ayugo dũ.

²Mi angí angi ki du pusiapusia rogo ro yo, mi abi bia tambuahe ti rimoro, Ako Mo nga Bahe ki susi.

³Ho avurare akaraga tiyo ni, i akotoko ki nikpiki mbiko wa du yo bara bangiro.

⁴Bambiko mo mbakadi gu pai nga gimi na gi ngbanga; mo asungu auru mbata ki nisapu ngbanga ni ruru he.

⁵Mo aza arikaaboro, mo agbarasi gbegberẽ aboro; mo agbandaka rimoyo nye anye kindi.

⁶Airavura nyasi, i gberẽ nye anye kindi; mo futuka gayo abaakporo; tingida pa yo nyasi.

⁷Ono Yekova ninasunga wa bakindo kindi, ko nyakasi gako mbata tipa sapangbanga;

⁸ko nasapa ngbanga zegino ni rurupai, ko nasapa ngbanga fu aboro rengbe arengba nzunzu.

⁹Yekova du ni sosono kirikiri gbata a tipa agu aboro i namanga yo, ni sosono kirikiri gbata ti rago fudifudipai.

¹⁰Agu yo ini pa rimoro i nakida kuti ro, Ako Yekova, bambiko mo nambu nga agu yo nagbata ro te.

¹¹Oni nibí bia atambuahe fu Yekova naraka Siona yo! oni nitáki pande pa gako mangaapai fu aboro!

¹²Bambiko gu ko naira bape kure natingida pa yo; bangiriko ago nga ti gu kpe nga ga rungosirungosi aboro te.

¹³Ako Yekova, mo íni pai fere! Mo bi nga gi gberãngbi mi nahi be agu yo nasoga re, mo nga gu ko natumba re pa angbadimo kpio,

¹⁴ya mi yugu pa tambua ro dunduko, rogo agu angbadimo nga ga aboro Siona, mi ki du pusiapusia rogo ga bata.

¹⁵Arikaaboro azorõ ku rogo gu due i age he; nduyo koto ti kina gu pio i aoko.

¹⁶Yekova ayugu tiko, ko asapu ngbanga; gbegberẽ aboro ni zizi yo ti kina fuo gu sunge nga ga beyo.

¹⁷Gbegberẽ aboro akáraga tiyo ku Baatoro kpikpi aboro yo, nga kina gu arikaaboro dunduko bangiriyo nago ti Mbori.

¹⁸Bambiko bangirise ago nga ti aboro zingo ahe kindi te, gu maabangirise nga ga rungorungo aboro ago nga kindi a te.

¹⁹Ako Yekova, mo gúari! Ka boro dí nga be ro ya; i nisápu ngbanga arikaaboro bara bangiro!

²⁰Ako Yekova, mo bá gunde ti yo! Arikaaboro íni he ya kina aboro nga yo!