Read zande Atambuahe 90 Bible Online

Atambuahe 90 - zande bible

Atambuahe 90

¹Gbia, mo adu ni gaani banye fu rika ngbatunga aboro dunduko.

²Mbata abaagangara nikaenga, mbata mo nikamanga kpotosende na zegino, Mbori nga mo, mbata rago nikaenga nye anye kindi.

³Kina ro nakaraga boro ku rogo nvutu sende, naya a, “Oni yéga berewe, awiri aboro!”

⁴Bambiko agarã kutu sa bangiro wa kina gba ho si asusi ni, watadu wa kina maarago yuru.

⁵Mo naroga aboro ku sa yo wa hihi ime, i ki du wa kina rame; wa kina gu nvuo nasona wiso ni fogo ho;

⁶wiso si namaa pai, ki nisono; ono nyemu i ki de he ku sande, si ki ugu.

⁷Bambiko ani nanyasa be ga zinga; ani nakiga akiga be ga era.

⁸Mo amoi gaani irairapai ku bara bangiro, na gaani okooko ingaapai rogo gu imarago du ti kpakpuro.

⁹Bambiko gaani arame dunduko nasusa rogo ga dingidingi ngbaduse, gaani agarã nadiga wa kina uko.

¹⁰Rago tipa gaani agarã wa garã 70; ono ka ngia mbiko ngarã si ki du wa 80; ono gaha nyaka nga kina mbusa na irairapai; bambiko si nasusa ni ipo, ani ki ga ku sa yo.

¹¹Da ini pa gu ome du ti ga zinga, na pa ga dingidingi ngbaduse ka i gunde ti ro!

¹²Mo yúgu pa geda gaani arame fu rani, ani di tatamana ku kpotorani yo.

¹³Ako Yekova, mo káraga tiro! Rago adú waĩ? Mo dú na nunga fu avururo!

¹⁴Ako, mo mbísi rani na ga weneringise wiso, ani ki ngbiko ki ningi angi rogo gaani arame dunduko.

¹⁵Mo ngíisi rani rengbe tipa agu arago mo arungosi rani ti ni, na agu agarã ani abi gbigbitapai ti ni.

¹⁶Mo ídi he fu avururo i bi ga sunge, na ga taarimo ku ri awiriyo.

¹⁷Gu wene ngbanya nga ga Yekova gaani Mbori dú ku ri rani, mo nyákasi gu mangapai nga ga berani, ii, gu mangapai nga ga berani mo nyákasi he.