Read zande Atambuahe 91 Bible Online

Atambuahe 91 - zande bible

Atambuahe 91

¹Gu ni nanye rogo gu barondo nga ga gu Ko nga Bahe ki susi, ninasunga tii kirima gu Ko du na tandu apai dũ,

²ni aya fu Yekova, “Mo nga gi bagbuko nga gi gbata; gi Mbori, nga gu ko mi nakida kuti ko.”

³Bambiko ko abátasa ro wa zire abati be gu gbina nga ga baimiru, na be kere ngbongi a;

⁴ko adáda ro ni pupoko, mo agbú ku tii pupoko yo; gako du yososo nga vurakube na gburu.

⁵Mo agúnde nga be gu gbudagbuda nata yuru te, na gu siida i nabafa ha uru a te;

⁶be gu ngbongi ninata rogo bitimo, na gu gbarasa apai ninamanga ti bebere uru a te.

⁷Aboro 1,000 atiwa pati ro, na 10,000 ku kumbabero; ono si ayé nga ki mbedi na mo te.

⁸Ono mo angána ha ni kina bangiro, ki nibi ga gbegberẽ aboro mosoro.

⁹Bambiko mo moi Yekova ni ga bagbuko, gu Ko nga Bahe ki susi ni ga baraka,

¹⁰si du gbigbitapai ayé nga sa ro te, a nga gberãngbi sa nikambeda na ga kporo wa sa te.

¹¹Bambiko ko arúga gako amaraika tipa ro, ka banda ro ngba gamo agene dunduko.

¹²I asóngoda ro ni beyo, mo ka fõ nduro ti mbia.

¹³Mo así ri bahu ni nduro na ri kpokporokusu, mo así ri paranga bahu, na ri gu nyaime du wa kpaka a.

¹⁴Bambiko wa ko aka kuti re ni nyemuse, si du mi abátasa ko ti ni; mi abánda ko, bambiko ko ini rimore.

¹⁵Ho ko nakpara ni fere, mi akáraga pai fu ko; mi adu na ko rago fudifudipai, mi abátasa ko, ki irisi pa ko.

¹⁶Mi ambísa ko na gbanga rame, ki yugu pa gi bata fu ko.