Read zande Asanza 1 Bible Online

Asanza 1 - zande bible

Asanza 1

¹Agu asanza nga ga Soromo wiri Dawidi, nangia bakindo aYisaraere, ko ake he:

²Ya boro ini tatamana na rugapai, ki ini agu apai nga ga rugatinapai,

³ki idi pa rugapai tipa manga pai ni tatamana, na rurupai, na ruru sarangbanga, na pa du apai rengbe arengba;

⁴ya i yugu birĩ fu azangainahe, na inahe na sia pa apai fu paranga aboro

⁵boro tatamana gi pai ki nikii rogo wirikapai yo, boro rugatinapai ki da ti ndikidi birĩ,

⁶ka ruga tini na sanza na ringbisa pa pai, na pa agu apai nga ga airatatamana, na gayo masaku.

⁷Gunde ti Yekova nga tonatona mburu inahe; ono mumungo aboro napayasi pa tatamana na rugapai.

⁸Ako wire, mo gí ga bamo rugapai, ka mo mbú nga ga namo yugopai ya;

⁹bambiko si adu ni kpakpari undahe ku riro, ni wene ũfongo ku goro.

¹⁰Ako wire, ka aboro ingapai so kpekpe foro, ka mo niídi nga ha ya.

¹¹Ka i ya, “Mo yé fuo rani, ani súngu ka sunguda uka kure, ani gbú ka imo boro wenesa ni wia;

¹²ani mbíri yo dunduko ni ungayo wa Baatoro kpikpi aboro wa agu yo nazorã ku Due yo;

¹³ani abí kikiipa ahe dunduko, ani ahísa gaani abambu na gbugbu ahe;

¹⁴mo dú na ani sa, ani dunduko adú na mangu marã sa”―

¹⁵Ako wire, ka mo tá nga na yo rogo gayo pai ya, mo aría nduro ngba gayo agene;

¹⁶bambiko nduyo gbidi ka ora sa gbigbitapai, i naipisa tiyo ka uka kure.

¹⁷Bambiko i gbaragi pio gbua ku barangba zire;

¹⁸ono agi aboro re nasunga ka uka kina kureyo ni sa yo, i nagbuka tipa imo kina ungayo ni sa yo.

¹⁹Wo du pa agu aboro ni ba sa sa naroga mokiisa be pa zuu; si nadia pa unga airaha ku sa yo.

²⁰Tatamana nakpara ni wawa ti gene bakporo, si natumba fugoho rogo ababagaahe yo;

²¹si nakpara ku ari rogo badungurati yo; si nagumba pai ti angbadimo bakporo:

²²“Ako oni nga azangainahe, rago adu waĩ, oni nikpi nyemu du ni azangainahe? Rago adu waĩ rago ningba ti abapayasi pa pai, mumungo aboro ki nisogo inahe a?

²³Oni sá tironi ka gia gi zapai; oni ngére, mi aúka torore ku ri roni; mi ayúgo gimi apai fu roni.

²⁴Bambiko mi yambu he oni ki ka aka ka dega turoni, mi taĩ bere ka boro aberã nga pa ha ya,

²⁵ono oni sa sangbare dunduko wa kina kungba pai gbua, oni akpi nga nyemu gi zapai a te,

²⁶mi amóma amoma rago gaoni gberãngbi; mi aúmo roni ho gbudagbuda ka zia roni ni,

²⁷ho gbudagbuda ka zia roni ni wa bakamikami yuge, gaoni gberãngbi ki ye wa gugugu yuge, ho fudifudipai ka ye ni na imisiri ku ri roni.

²⁸I ayámba re ni gu rago re, ono mi akáraga nga pai te; i agbáta re nyanyaki, ono i abí nga re te.

²⁹Bambiko wa i asogo inahe ka i asia nga gunde ti Yekova ya,

³⁰ka i akpi nga nyemu gi rugapai a ya, ki nipayasi pa gi zapai dunduko,

³¹si du i ka ri kina zuzu gayo mangaapai ti ni ki mbiki be gayo sangaapai.

³²Bambiko gu tikusayo nga ga azangainahe si nikaimo yo, na gu pai dũ ni wene he bangiri mumungo aboro si nikagbarasa yo;

³³ono gu boro nikadega tuni kono du mi ni, ni aráka ni bandabanda ni, ki du zezeredi, zanga gunde be gbigbitapai.”