Read zande Asanza 10 Bible Online

Asanza 10 - zande bible

Asanza 10

¹Agu asanza nga ga Soromo. Tatamana gude nafu ngbarago fu bani, ono mumungo wiri de nga pa rungo fu nani.

²Agu aũkumuko bi yo be gbegberẽpai, si au nga te, ono rurupai nakusa boro rogo kpio yo.

³Yekova ambú nga ruru boro ni kpi be gomoro te, ono ko nabafa gu nyemu he ku sa yo nga ga gbegberẽ aboro.

⁴Mumungo be boro nafu rungo fu ni, ono be ngangarã boro nafu kumuko.

⁵Gu wiri boro nadungura he kita nga ngangarã gude, ono gu wiri boro nara ara regbo ke ahe ni nafu kina zee.

⁶Maku du ri ruru boro, ono ngba gbegberẽ boro naoka pa zuu.

⁷Tingida pa ga ruru boro apai nafu maku, ono rimo gbegberẽ aboro ago ago.

⁸Gu ni nga iratatamana kpotoni yo, ni agía sangba, ono mumungo boro menemene agbérã agberã.

⁹Gu ni nata rogo rengo ni nata nzunzu, ono gu ni nairasi gani apai, i aína pa ni aina.

¹⁰Gu ni napira bangirini ni natona pa fudifudipai, ono gu ni naza pai nyanyaki ni namanga pa zereda.

¹¹Ngba ruru boro wa gugaabi unga, ono ngba gbegberẽ boro naoka pa zuu.

¹²Sogote nakusa kpata, ono nyemuse nadada pa tiandika dunduko.

¹³I bi tatamana ti kina ngba gu ni ini pa kparaka rogo apai nzunzu, ono kina kpudu du tipa gii gu ni yo du gbua zanga rugatinapai.

¹⁴Airatatamana naiga inahe, ono ga azangatatamana kungba fugo naye na pa gbarasa ni mbembedi.

¹⁵Ga irakumuko kumuko du wa gani nyanyaki bakporo; ono gu pa rungo nga ga rungorungo boro nagbarasa ni.

¹⁶Ga ruru boro mosoro sunge namanga pai sa unga, ono ga gbegberẽ boro mokiisa si sa ingapai.

¹⁷Gu ni nagia sangba rugute ni du ngba gene unga, ono gu ni nasoga pa zapai ni naingisa tini.

¹⁸Gu ni naoka pa sogote nga bagumba zire, na gu ni nasoa pai nga iramungo.

¹⁹Ho du dungu afugo ni, yo du tindika ni a, ono gu ni naruga ngbani namanga pai ni rugatinapai.

²⁰Mirã ruru boro du wa siasia feda; ono berã gbegberẽ boro are nga na pai te.

²¹Ngba ruru boro nariga dungu aboro, ono mumungo aboro nakpi be zingo wene berã.

²²Gu maku nga ga Yekova nakumukosi boro, ko nagbia nga rungo kuti ni te.

²³Si wa pa mbaro fu mumungo boro ka manga gbegberẽpai, ono sino iratatamana nga ngbarago fu boro rugatinapai.

²⁴Gu pai gbegberẽ boro agunde be he, si ayé kina ku ri ni, ono gu nyemuhe nga ga ruru boro, i aída pa ha aida fu ni.

²⁵Ho bakamikami yuge nasusa ni, gbegberẽ boro nadu nga ho berewe te, ono ruru aboro nanyaka be he nye anye kindi.

²⁶Wa kakaĩ imekakue fu rinde, na wa ngime fu bangirise, wo du iranyomoro fu agu yo nakedi ni.

²⁷Gunde ti Yekova nagizasi arame, ono garã gbegberẽ boro adú ni kina wiri guru he.

²⁸Gu maabangirise nga ga ruru aboro adá na ngbarago, ono gu sogima nga ga gbegberẽ boro adá nga te.

²⁹Yekova du wa nyanyaki gbata fu gu ni namanga rurupai, ono wa gbarasahe fu amangi irairapai.

³⁰I adía nga ruru boro rogo gu ba ni te, ono gbegberẽ boro aráka nga rogo ringara te.

³¹Ngba ruru boro nakusa pa tatamana, ono gu mirã biriki i akáta ha akata.

³²Ngba ruru boro ini gu pai rengbe na pa ida ha, ono ngba gbegberẽ boro ini kina pa biriki.