Read zande Asanza 11 Bible Online

Asanza 11 - zande bible

Asanza 11

¹Biriki ringbisahe nga kere gbegberẽ he bangiri Yekova; ono ruru ringbisa baroãhe nga gu ngba ti ko.

²Ho ruka naye ni, pa wasiro naye a; ono tatamana du fu agu yo du ni bayee yo.

³Gu ruru sino nga ga ruru aboro ninangbe ku mbata yo fu yo, ono gu keretu nga ga airabiriki nagbarasa yo.

⁴Kumuko au nga ti uru dingidingi ngbaduse te, ono rurupai nabatasa boro be kpio.

⁵Gu rurupai nga ga zangabiriki naruga gani pai nzunzu, ono gbegberẽ boro nati be kina gani gbegberẽ pai.

⁶Gu rurupai nga ga ruru yo nabatasa yo, ono agu yo namanga pai ni biriki i azía yo kina rogo gayo nyemuhe.

⁷Ho gbegberẽ boro nakpi ni, gani maabangirise nakpi a, gu sogima nga ga azangasinombori ki du gbua.

⁸I nabatasa ruru boro rago fudifudipai, ono gbegberẽ ni ki ti ku rogo ho ku ba ruru boro.

⁹Zangasinombori nagbarasa kurani ni kina ngbani, ono bambiko inahe ka i batasi ruru yo ti ni.

¹⁰Ho pai nandu ni wenengaĩ fu ruru aboro, bakporo nangi angi; ho gbegberẽ boro nakpi ni, ngbiko na ngbarago ki du.

¹¹Bambiko gu maku nga ga ruru aboro, bakporo ki du ni kiisikiisi pa ha, ono i bafu he bambiko fugo gbegberẽ aboro.

¹²Gu boro napayasi kurani wene berã ti ni te, ono boro rugatinapai niongo aonga.

¹³Gu ni nandu kirikiri wa boro totoroto nakusa okooko apai, ono gu ni du na toro rengo ti ni naoka pai.

¹⁴Ho adu nga bangbe ku mbata yo ni ya, aboro nati ati, ono bambiko rimbasa aboro rondo, yo du pa zereda ni.

¹⁵Gu ni du tipa tumo ga kungba boro pai, kina ni nikaegerã tipa ha, ono gu ni nasoga pa tumo tipa kurani, ni naraka zezeredi.

¹⁶Gu de nga iraundahe nabi taarimo, na airazuu nabi aũkumuko.

¹⁷Gu boro naina pai ni namanga wenepai tipa kina mbisimoni, ono kere boro naimisa kina tini.

¹⁸Gbegberẽ boro nabi gbegberẽ mosoro sunge, ono gu ni narú rurupai ni nadia wene mosoro be he.

¹⁹Gu boro du nyanyaki rogo rurupai yo ni anyé ni ungani, ono gu ni nado fuo gbigbitapai akpí akpi.

²⁰Agu yo du na gbegberẽ berã ti yo du ni kere gbegberẽ aboro ku bangiri Yekova, ono agu yo zanga biriki apai, i ngba ti ko.

²¹Oni i íni he ni rengo ya gbigbita boro azánga nga mbusa te, ono agu yo du ni ruru yo abáta abata.

²²Wa fongo dahabu õ mukuru yo, wo du wene de zanga sia pa apai.

²³Gu nyemuhe nga ga ruru yo nada ti kina wenepai; ono gu sogima nga ga gbegberẽ boro nada ti dingidingi ngbaduse.

²⁴Gu boro kina ho nafu ahe gbe, ono ni ki du ni irakumuko ki susi; gu kura ni kina ho nabengeta aboro ka ni afu nga gu rengbe ya, zingo ahe namanga ni amanga kindi.

²⁵Iragamahe azuga azuga gbe, ono i nisuka age ku akoro akura ra yo.

²⁶Aboro natiwa gu boro naka na zendeahe, ono maku du ku ri gu ni nabaga ha.

²⁷Gu ni nagbata wenepai ngangarã nagbata gu pai ngba angba, ono gu ni nagbata gbigbitapai, kina ha nikaye fu ni.

²⁸Gu ni nakida kuti kina gani aũkumuko apáya apaya, ono ruru boro afúna wa fogo kpengua.

²⁹Gu ni narungosi gani aborokporo ni adía kina yuge, mumungo boro adú ni ga iratatamana moyambu.

³⁰Gu zuzuhe nga ga ruru boro nga ngua unga, iratatamana nagbata aboro ka batasa yo.

³¹Ka i fu mosoro ga ruru boro basapai fu ni auru kpotosende, waĩ ka ga gbegberẽ boro na ga boro ingapai ka du!