Read zande Asanza 12 Bible Online

Asanza 12 - zande bible

Asanza 12

¹Gu boro nakpi nyemu rugapai ni nakpi nyemu inahe a, ono gu ni nasoga zapai ni nga mumungo boro.

²Wene boro abi wenepai be Yekova, ono gu boro nasanga gbegberẽapai ko nasara ngbanga kuti ni.

³Mbakadapai ni wene he fu boro adú nga mbiko gbegberẽpai te, ono i amó nga tarã ruru aboro wa sa te.

⁴Wene de du wa ũirisa fu kumbari; ono gu ri namanga pa zee ri wa zirĩ he rogo amemeko yo.

⁵Berã ruru boro nga pa rengo; ono gu fugo rugaapai nga ga gbegberẽ boro si nga biriki.

⁶Agu apai nga ga gbegberẽ boro nasunguda pa uka kure, ono ngba ruru boro nabatasa aboro.

⁷I bafu gbegberẽ aboro, i ho berewe te, ono ga ruru aboro kporo arú aru kindi.

⁸I natambua boro kuti sangba gani wene berã, ono gu ni du na gbegberẽ berã, i napayasi pa ni apayasi.

⁹Gu boro du ni umba pa ni, namanga gani sunge ni tini ni ngba ki susi gu ni naberã pa kia ni ni tini, ono zingo riahe namanga ni.

¹⁰Ruru boro naberã pa gani nya, ono gu inapai nga ga gbegberẽ boro si nga kere he.

¹¹Gu boro nasopa gani bino ni adú na bakere riahe be ni, ono gu boro napeka fuo kungba pai ni zanga wene berã.

¹²Gbegberẽ boro nakpi ga gbegberẽ aboro ahe, ono tarã ruru boro nazu zuzuhe.

¹³Fugo samungu nga pa gbegberẽ boro nazia ni wa gbina, ono ruru boro nakura akura rogo fudifudipai.

¹⁴Boro nambi be wenepai be kina gu fugo nakura ngbani yo, gu mangapai nga ga be boro si nakaraga kina ha fu ni.

¹⁵Gu pai nga ga mumungo boro si ni kina ruru he bangirini, ono iratatamana nadega tuni sa rugapai.

¹⁶Ga mumungo boro zinga ipi ka ina ha, ono bangbasia aberã nga pa wasiro te.

¹⁷Gu ni nagumba pa rengo nayugo pa ruru dezirepai, ono irazire dezire nagumba nangahe.

¹⁸Gu boro kina ho nagba sa fugo wa kina baso sa rũ he, ono mirã iratatamana nafu husa.

¹⁹Ngba bagumba rengo du ni mbakadimbakadi he nye anye kindi, ono mirã bagumba zire aíma ngbutuko.

²⁰Nangahe du kpoto agu yo yo nasanga gbigbitaapai, ono agu yo nasanga wenepai du na ngbarago.

²¹Imisiripai amanga nga ruru aboro wa sa te, ono gbegberẽ boro hi ahi be fudifudipai.

²²Ngba bagumba zire nga kere gbegberẽ he fu Yekova, ono kina agu aboro namanga pai na rengo ngba ti ko.

²³Bangbasia naoka gani inahe; ono mumungo aboro nataka pande pa gayo mumungopai.

²⁴Be ngangarã boro nikazoga rago, ono i amáa iranyomoro ku tii be amangisunge.

²⁵Rungo boro ku kpotoni yo nazoga ni ku sande, ono wene fugo nafu ngbarago fu ni.

²⁶Ruru boro nga ngbembata yo fu kurani, ono ga gbegberẽ aboro pai naingisa yo.

²⁷Iranyomoro nambakada nga gu nya ni nizi ru te, ono ngangarã boro adía kikiipa kumuko.

²⁸Ngba gene rurupai yo du unga ni, ono gene irairapai nandu sa kpio.