Read zande Asanza 13 Bible Online

Asanza 13 - zande bible

Asanza 13

¹Tatamana gude nagia ga bani rugute, ono bapayasi boro agia nga pa zapai te.

²Wene boro nari wene ahe mbiko kina gu zuzuhe nakura ngbani yo, ono gu nyemuhe nga ga airabiriki du tipa zuu.

³Gu boro nabanda ngbani ni nabanda ungani a, ono gu ni za ngbani gbagaza, gbarasapai naye fu ni.

⁴Mbisimo iranyomoro nakpi nyemu ahe, ka ni abi nga ha wo ya, ono mbisimo ngangarã boro nadu na ahe kpaima.

⁵Ruru boro nasoga pa zire, ono gbegberẽ boro namanga pai ni zee na pa wasiro.

⁶Rurupai nabanda gu ni ru gani apai aru, ono ingapai naba gbegberẽ aboro.

⁷Gu boro ho nananga he ya irakumuko nga ni, ono ka he adu nga be ni ya; kura ni ho nananga he ya rungorungo boro nga ni, ono ni ki du na bakere kumuko.

⁸Ga boro ũmotumo tipa ungani nga gani kumuko, ono rungorungo boro agia nga fugo zapai te.

⁹Gu imarago nga ga ruru aboro si nangi angi, ono i abísa ga gbegberẽ boro we abisa.

¹⁰Azanga gia rugapai nadarã pai ni ruka, ono tatamana du ti agu aboro naida pa rugapai wenengaĩ.

¹¹Gu kumuko bi boro be pa enda, si apáya apaya, ono gu boro nadungura he toni toni, si akía akia.

¹²Ima na pa maabangirise nafu kaza ngbaduse, ono ho gu he nida ni i akpi nyemu he, si nidu wa ngua unga.

¹³Gu ni napayasi pa pai ni naye na gbarasapai fu kina tini, ono gu ni nagunde ti sangba ndika, i afú mosoro afu fu ni.

¹⁴Gu yugopai nga ga iratatamana si wa gugaabi unga, ya boro guari pati agbina kpio.

¹⁵Wene berã nafu gu pai ngba angba, ono gu gene nga ga airabiriki du wa nyanyaki pai.

¹⁶Bangbasia namanga sunge dunduko na inahe, ono iramungo nagbandaka pa mungo gbayaga.

¹⁷Gbegberẽ bandusunge naba aboro ku rogo fudifudipai, ono irarengo mokedi naye na husa fu aboro.

¹⁸Zingohe na wasiro du fu gu ni naka pa rugute, ono gu ni nagia pa zapai, i nairisa ni airisa.

¹⁹Ka gu pai boro akpi nyemu he da, si nga wenepai fu mbisimoni; ono ka ne gbigbitapai si nga kere gbegberẽpai bangiri mumungo aboro.

²⁰Gu boro nata na boro tatamana ni adú ni iratatamana a, ono gu badiata nga ga mumungo aboro, ima azía yo wa sa.

²¹Gberã nunguro nado fuo aboro ingapai, ono u na mosoro du fu ruru boro.

²²Wene boro nambu ũkumbo fu awiri wirini, ono gu kumuko nga ga boro ingapai i niigi he tipa ruru boro.

²³Ga rungorungo aboro fute idi ki susi, ono si ingi be ni mbiko zanga ruru sarangbanga.

²⁴Gu ni mbu kpudu ni nasoga wirini asoga, ono gu ni nakpi nyemu wirini ni naruga ni nyanyaki.

²⁵Ruru boro na he be ni rengbe na gani gomoro, ono vuru gbegberẽ boro yo nambu be zingo riahe.