Read zande Asanza 14 Bible Online

Asanza 14 - zande bible

Asanza 14

¹De tatamana nadua gari bambu, ono mumungo de nagbandaka ha ni kina beri.

²Gu boro nata rogo gani rurupai yo nagunde ti Yekova, ono gu ni nga irakeretu rogo gani apai yo, napayasi ko.

³Fugo mumungo boro du wa ngbangbaki tipa ta giini yo na ni, ono kina ngba airatatamana nikabanda yo.

⁴Yo adu nga abaabagara ni ya, riahe vuru bambu yo te; ono bakere ida riahe naye be ome abaabagara.

⁵Irarengo dezire agumba nga zire te, ono irazire dezire nagumba kinaku zire.

⁶Bapayasi aboro nigbata tatamana vurũ, ono inahe du ni ipiipi pai fu boro rugatinapai.

⁷Mo gúari bara bangiri mumungo boro, bambiko mo abí nga pa inahe yo te.

⁸Gu tatamana nga ga bangbasia, si nga ka ruga tini na gani pai, ono gu mungo nga ga mumungo boro nga kina pa nangahe.

⁹Mumungo boro namoma tindika amoma, ono wenepai du fu ruru boro.

¹⁰Kina kpoto boro yo ini gaha imisiriapai, kungba boro akoda nga tini na gaha ngbarago te.

¹¹I agbarasa ga gbegberẽ boro kporo agbarasa, ono ga ruru boro bamburoko adú adu.

¹²Pai ho du ni ruru he bangiri boro, ono digida ha nga agu apai nga kina ga kpio.

¹³Zavura rogo mongo ngbadu boro yo na kina rungo, digida pa ngbarago nga kina pa gberãrago.

¹⁴Kpoto tikusayo yo nikahi be kina zuzu gani apai, ono wene boro ambí be kina agu apai nikaye vuru beni.

¹⁵Zangainahe naida pa apai aida du, ono bangbasia nawisiga pa gani nduge wenengaĩ.

¹⁶Iratatamana namakia pa apai ki guari pati gbigbitapai, ono iramungo naba rugapai ku sa yo, ki du adu ruguzuruguzu.

¹⁷Gu boro nazinga ni ipo namanga pai ni mumungo ho, ono boro sia pa apai, aboro nasoga ni asoga.

¹⁸Zangainahe nadia kina mosoro mungo, ono i nimoi kpakpari inahe ku ri bangbasia.

¹⁹Gbigbita aboro ninanugadi ku bara bangiri wene aboro, na gbegberẽ aboro pa ngbadimo ga ruru aboro bakporo.

²⁰I nasoga rungorungo boro asoga zavura akurani vurũ, ono irakumuko du na dungu abadiani.

²¹Gu boro napayasi pa kurani, ni nga boro ingapai, ono gu ni du na nunga rungorungo boro, ngbarago du fu ni.

²²Agu yo nasanga gbigbitapai, a nga i ingi pai, te? Ono inapai na rengo du fu agu yo nasanga wenepai.

²³Rogo asunge dunduko u du rogo ho, ono kungba fugo gbua nandu sa zingohe.

²⁴Ga ruru boro kpakpari irisa nga gani aukumuko, ono gu mungo nga ga mumungo aboro nga kina pa mungo.

²⁵Wene dezire nabatasa aboro, ono gu ni nagumba zire nga bakusipai.

²⁶Rogo gunde ti Mbori, yo du boro ni zukazuka, awirini ki du na bagbuko.

²⁷Gunde ti Yekova nga gugaabi unga, ya boro guari pati agbina kpio.

²⁸Bakindo ni taasitaasi ko mbiko nge aboro ange, ono be zanga aboro, pai gberẽ fu wiri bakindo.

²⁹Gu ni nga bayee boro tipa zinga du na bakere rugatinapai, ono gu ni naipo na zinga ni naabia pa mungo.

³⁰Wene zezeredi berã nafu unga fu boroboro, ono kpihe nazirĩsa ameme,

³¹Gu boro narungosi rungorungo boro ni nagbarasa kina rimo Bamangini, ono gu ni naina pai fu irazingohe nairisa ko.

³²I fo gbegberẽ boro ku sande tipa gani gbegberẽ mangapai, ono ruru boro nabi bagbuko rago kpioni.

³³Tatamana nanye kina ku kpoto gu ni yo du na rugatinapai, ono aboro ini gu pai dũ ku kpoto mumungo aboro yo.

³⁴Rurupai nakiisa pa rikaaboro, ono ingapai nga pa gbarasarimo fu agu aboro.

³⁵Ga bakindo ngbanya du fu kina gu moyambu namanga pai ni tatamana, ono gako dingidingi ngbaduse du kuti gu ni namanga pa zee.