Read zande Asanza 15 Bible Online

Asanza 15 - zande bible

Asanza 15

¹Zezeredi karagapai nazeresa zinga, ono iimi fugo nazingisa zinga.

²Mirã iratatamana nagumba pa inahe nzunzu, ono ngba mumungo boro nakusuka kina pa mungo.

³Bangiri Yekova du rogo arago du, ki ningere ku ri gbigbita aboro na wene aboro a.

⁴Gu mirãse nagumba wenepai du wa ngua unga, ono keretu ngba yo nakuadi toro.

⁵Mumungo boro napayasi pa ga bani rugute, ono gu ni nagia pa rugapai nga bangbasia.

⁶Bakere kumuko du dimo ku ruru boro yo, ono rogo agu ahe naye fu gbegberẽ boro, yo du fudifudipai ni.

⁷Ngba iratatamana nagbandaka inahe, ono ngbadu mumungo aboro namanga nga wo te.

⁸Gu ũmotumo nga ga gbegberẽ boro nga kere gbegberẽ he bangiri Yekova, ono kina ga ruru boro kparakpe ngba ti ko.

⁹Gu pai nga ga gbegberẽ boro nga kere gbegberẽpai bangiri Yekova, ono ko nakpi nyemu gu ni napeka fuo rurupai.

¹⁰Kere rugapai du ho tipa gu ni nambu gene rurupai; gu ni nasoga zapai akpí akpi.

¹¹Wa du Baatoro kpikpi aboro na Bagbarasahe ni zaza ha bara bangiri Yekova, waĩ ka kpoto awiri aboro yo adu nga ni zaza ha ti ni fu ko ki susi ya!

¹²Bapayasi pa aboro akpi nga nyemu i za ni te; ni akpi nga nyemu ka ndu koyo du iratatamana ni a te.

¹³Ngbarago ku kpotose yo nasa kpakpu boro ni wene he; ono rungo ku kpotose yo si naimisa toro boro.

¹⁴Gu berã du na rugatinapai nagbata inahe, ono airamungo nariga tiyo na kina pa mungo.

¹⁵Arame rungorungo boro dunduko nga kina gbigbitapai, ono gu ni du na wasa kpotoni yo ni du wa ni pati pumbo kindi.

¹⁶Toni kumuko gbia kuti gunde ti Yekova ngba ki susi ti bakere ũ kumuko du na fudifudipai pati ni.

¹⁷Ri kpepasio yo du nyemuse ni, ngba ki susi ti ri babagara nzeme, yo du kina sogote ni.

¹⁸Boro ima ngbaduse nazingisa kpata, ono gu ni nga bayee ni nazeresa pa paa.

¹⁹Gene ku iranyomoro du na akiwe, ono gene ku ruru aboro du ni ruru he kpasakpasa.

²⁰Gude tatamana nafu ngbarago fu bani, ono mumungo boro napayasi pa nani.

²¹Mungo nga pa ngbarago fu gu ni zanga wene berã, ono boro rugatinapai nandu gani nduge nzunzu.

²²Yo adu nga rugapai ni ya, apai yo na kina gberãrago, ono bambiko rimbasa aboro rondo apai ni nyakasinyakasi he wenengaĩ.

²³Boro na ngbarago mbiko gu wene karagapai nakura ngbani yo, na gu pai nakura ti kina ragoho, ngba ha angba!

²⁴Ga iratatamana gene nandu ku ari yo sa kina unga, ya ni ne gene ku Baatoro kpikpi aboro yo.

²⁵Yekova nasipa ga iraruka kporo ku sande, ono ko nambakada ga adekurugbo abangbandarago.

²⁶Ga gbegberẽ aboro aberã nga kere gbegberẽpai fu Yekova, ono agu apai du ziazia ngba ti ko.

²⁷Gu ni nga kere irakangadu tipa gu mokiisa aru nga pa ha ya, narungosi kina kpuni, ono gu ni ninasoga pa marã mabirimo nikadu ni ungani.

²⁸Berã ruru boro nawisiga pa karagapai, ono ngba gbegberẽ boro nakusuka kina gbegberẽapai.

²⁹Turú Yekova aturã na gbegberẽ aboro, ono ko nagia ga ruru aboro kpe agia.

³⁰Gu imarago nga ga bangirise nangiisa kpoto boro yo, wene pangbanga nakiisa nzeme meme.

³¹Gu ni nadega tuni sa wene rugapai anyé dagba airatatamana.

³²Gu boro nabasa pa rugute napayasi kina tini, ono gu ni nadega tuni sa rugapai ni nidu na rugatinapai.

³³Gunde ti Yekova nga rugute gene tatamana, umbasitise du mbata fu irisa.